فوتو:advantshop.net
الماتىنىڭ تۇركسىب اۋدانىندا ەسىرتكى ساتاتىن ينتەرنەت-رەسۋرسقا باعىتتايتىن QR-كودتار جاپسىرىلعان پاراقشالاردى تاراتقان كۇدىكپەن ەر ادام ۇستالدى. بۇل تۋرالى پوليتسيا دەپارتامەنتى جازدى، دەپ حابارلايدى "ادىرنا".
اقپاراتقا سايكەس، كۇدىك تۋدىرعان جاپسىرمالاردى ۋچاسكەلىك ينسپەكتور اكىمشىلىك اۋماقتى ارالاۋ كەزىندە بايقاعان. تەكسەرۋ بارىسىندا ونداعى QR-كودتار ەسىرتكى زاتتارى ساتىلاتىن جانە ەسىرتكى رەسۋرسى جارنامالاناتىن سايتقا باعىتتايتىنى انىقتالدى.
جەدەل-ىزدەستىرۋ ءىس-شارالارىنىڭ ناتيجەسىندە پوليتسيا قىزمەتكەرلەرى كۇدىكتىنىڭ جەكە باسىن انىقتاپ، ونى ۇستادى. ول تالعار اۋدانىندا تۇراتىن، جۇمىسسىز 25 جاستاعى ازامات بولىپ شىقتى. قۇقىق قورعاۋ ورگاندارىنىڭ مالىمەتىنشە، ول ەسىرتكىگە تاۋەلدى.
ۇستاۋ كەزىندە ەر ادامنان ءارى قاراي تاراتۋعا دايىندالعان QR-كودتارى بار ونداعان باسپاحانالىق جاپسىرما تابىلىپ، تاركىلەندى.
وقيعاعا بايلانىستى قىلمىستىق ءىس قوزعالدى. كۇدىكتى قاماۋعا الىندى.
پوليتسيا تۇرعىنداردى وسىنداي جاعدايلار تۋرالى حابارلاۋعا شاقىردى. ەسىرتكى رەسۋرستارىن جارنامالايتىن جاپسىرمالار تابىلعان جاعدايدا، ازاماتتارعا مۇمكىندىگىنشە ولاردى وزدەرى الىپ تاستاۋ نەمەسە 102 نومىرىنە حابارلاۋ ۇسىنىلادى.
قۇقىق قورعاۋ ورگاندارىنىڭ ايتۋىنشا، جويىلعان ءاربىر QR-كود تىيىم سالىنعان زاتتاردىڭ تارالۋىن شەكتەۋگە كومەكتەسەدى.
