2025 جىلدىڭ 1 قاڭتارىنان باستاپ قازاقستان رەسمي تۇردە بريكس-كە سەرىكتەس مەملەكەت مارتەبەسىن الادى. بۇل تۋرالى رەسەي پرەزيدەنتىنىڭ كومەكشىسى يۋري ۋشاكوۆ مالىمدەدى، دەپ حابارلايدى “ادىرنا” ۇلتتىق پورتالى.
اقپاراتقا سايكەس، قازاقستانمەن قاتار تاعى سەگىز مەملەكەت بريكس سەرىكتەسى بولۋعا شاقىرۋدى قابىلدادى، ونىڭ ىشىندە بەلارۋس، يندونەزيا، وزبەكستان جانە كۋبا بار.
قازاقستان جالعىز ەمەس
رەسەي پرەزيدەنتىنىڭ كومەكشىسى يۋري ۋشاكوۆ 22-24 قازاندا قازان قالاسىندا وتكەن بريكس ءسامميتى ماڭىزدى شەشىمدەرگە قول جەتكىزگەنىن ايتادى.
«ءسامميتتىڭ ماڭىزدى ناتيجەلەرىنىڭ ءبىرى بريكس-كە سەرىكتەس ەلدەرىنىڭ ساناتىن بەلگىلەۋ جانە 13 مەملەكەتتىڭ ءتىزىمى تۋرالى كەلىسىم بولدى. بۇل مەملەكەتتەرگە ءتيىستى شاقىرۋلار جىبەرىلدى. بۇگىنگە دەيىن بريكس سەرىكتەس-مەملەكەتى بولۋعا دايىندىعى تۋرالى مالىمدەمەلەر بەلارۋس، بوليۆيا، يندونەزيا، قازاقستان، كۋبا، مالايزيا، تايلاند، ۋگاندا جانە وزبەكستاننان دا ءتۇستى»، - دەدى ۋشاكوۆ جۋرناليستەرگە.
بۇل مارتەبە جاڭا سەرىكتەستەر وكىلدەرىنىڭ بريكس سامميتتەرىنىڭ جەكە كەزدەسۋلەرىنە، سىرتقى ىستەر مينيسترلەرىنىڭ كەزدەسۋلەرىنە، قاۋىپسىزدىك ماسەلەلەرىنە جاۋاپتى جوعارى وكىلدەردىڭ كەزدەسۋلەرىنە جانە قاۋىمداستىقتىڭ باسقا دا ءىس-شارالارىنا قاتىسۋىن قامتيدى.
جاقىن ارادا وسىنداي شاقىرۋلار جىبەرىلگەن تاعى ءتورت ەلدەن جاۋاپ كۇتىلۋدە.
بريكس جانە بەرىك
قازان ايىندا قازاق قالاسىنداعى بريكس ءسامميتى الدىندا قازاقستان رەسپۋبليكاسى پرەزيدەنتىنىڭ كەڭەسشىسى – ءباسپاسوز حاتشىسى بەرىك ءۋالي وسى توپتان استاناعا شاقىرتۋ تۇسكەنىن حابارلاعان. وندا قازاقستاننىڭ بريكس قۇرىلىمىنا كىرۋ مۇمكىندىگىن قاراستىرۋ تۋرالى ۇسىنىس ايتىلعان.
«قازاننىڭ 23-24-ءى قازاندا بريكس ءسامميتى وتەدى. بىلۋىمىزشە، پرەزيدەنت قاسىم-جومارت توقاەۆ بۇل فورۋمعا قازىر وسى بىرلەستىكتى باسقارىپ وتىرعان ۆلاديمير ءپۋتيننىڭ قوناعى رەتىندە شاقىرىلعان. پرەزيدەنتتىڭ جوسپارىندا بريكس سامميتىنە قاتىسۋ بار. ول سوندا 24 قازاندا ۇيىمنىڭ اۋتريچ فورماتىنداعى كەڭەيتىلگەن وتىرىسىندا ءسوز سويلەۋدى جوسپارلاپ وتىر»، - دەگەن ەدى بەرىك ءۋالي بريكس ءسامميتى قارساڭىندا.
سوندا بەرىك ءۋالي "قازاقستان بريكس ۇيىمىنىڭ دامۋىن مۇقيات باقىلاپ وتىر جانە ونىڭ نەگىزىن قالاۋشى مەملەكەتتەردىڭ كەز كەلگەن ءىرى دەرجاۆالاردىڭ گەگەمونياسىنان ازات، ءادىل جانە دەموكراتيالىق الەمدىك ءتارتىپ قۇرۋعا شاقىرۋلارىن قولدايدى،"- دەپ مالىمدەگەن.
ودان دا قىزىعى مىناۋ.
قازاقستان پرەزيدەنتىنىڭ كەڭەسشىسى - ءباسپاسوز حاتشىسى بەرىك ءۋالي "قازىرگى تاڭدا جانە جاقىن بولاشاقتا قازاقستان بريكس-كە مۇشەلىككە ءوتىنىش بەرمەيدى. بۇل شەشىم ۇيىمنىڭ دامۋ پەرسپەكتيۆالارى مەن كوپ ساتىلى پروتسەسىن ەسكەرە وتىرىپ قابىلدانعان،"- دەگەن.
