ساعاتتاپ اۆتوبۋس كۇتكەن تۇرعىندار كىمگە وكپەلى؟

781

اقتوبە وبلىسىندا قالاىشىلىك جولاۋشىلار تاسىمالىمەن اينالىساتىن پاتپ جانە "اۆتوپارك" جشس جۇرگىزۋشىلەرى جۇمىسقا شىعۋدان باس تارتىپ، اقىرىندا تۇرعىندار ساعاتتاپ اۆتوبۋس كۇتۋگە ءماجبۇر بولدى دەپ حابارلايدى "ادىرنا" ۇلتتىق پورتالىنىڭ ءتىلشىسى.

اپتا باسىندا مۇنداي "جاعدايدى" كۇتپەگەن تۇرعىندار جولاۋشىلار تاسىمالىمەن اينالىساتىن كاسىپورىنداردىڭ ("جولاۋشىلار تاسىمالى كاسىپورنى" جشس مەن "اۆتوپارك" جشس)  مەن جەرگىلىكتى بيلىككە وكپە-رەنىشتەرىن ايتۋدا. سەبەبى بۇل كۇندەرى اقتوبەلىكتەردىڭ بىرقاتارى جۇمىسقا كەشىكسە، ەندى بىرەۋلەرى باراتىن جەرىنە جەتە الماي، تاكسي توقتاتقان. ال بۇل جاعدايدى قالت جىبەرمەگەن تاكسي جۇرگىزۋشىلەرى قىزمەت باعاسىن ءوسىرىپ جىبەرگەن.

"اۆتوپارك" جشس باسشىلىعى قوعامدىق كولىكتەردە ەلەكتروندىق تولەم جۇيەسى ەنگىزىلگەننەن كەيىن اۆتوبۋس جۇرگىزۋشىلەرى كولدەنەڭ تابىستان "ايىرىلىپ", سول ءۇشىن زاڭسىز ەرەۋىل جاساعانىن ايتادى. قالا  تۇرعىندارىنان قولايسىزدىق تۋدىرعانى ءۇشىن كەشىرىم سۇراعان  سەرىكتەستىك باسشىسى مەيىرجان وندىرگەنوۆ حالىقتىڭ جاعدايىن ەمەس، ءوز قالتاسىن ويلاعان  جۇرگىزۋشىلەرمەن كەلىسىمشارتتى ۇزەتىنىن مالىمدەدى. ول ءتىپتى قازىر جۇمىسقا جاڭادان اۆتوبۋس جۇرگىزۋشىلەرىن ىزدەپ جاتقانىن دا ايتىپ بەردى.

— بۇگىن قالاىشىلىك قوعامدىق كولىك قوزعالىسى قالىپتى دەڭگەيدە ءجۇردى. دەگەنمەن اۆتوبۋستاردىڭ ءجۇرۋ ينتەرۆالى وتە ۇزاق. ءبىر جەرگە بارۋ ءۇشىن 1,5-2 ساعات ۋاقىتىمىز كەتەدى. جول اقىسىنىڭ قىمباتتاعانى دا بىزگە وڭايعا ءتۇسىپ تۇرعان جوق. دەگەنمەن ارنايى كارتوچكا الساڭ، ونى جەڭىلدىكپەن تولەۋگە بولادى، — دەيدى اقتوبە قالاسىنىڭ تۇرعىنى اسەم ماحينا.

ايتا كەتۋ كەرەك، مامىر ايىنىڭ اياعىندا اقتوبە قالاسىندا قوعامدىق كولىكتەرگە جاڭا تولەماقى جۇيەسى ەنگىزىلگەن. سوعان سايكەس  تۇرعىندار  ەندى قولما-قول تۇردە 150 تەڭگە، ال ارنايى "اۆتوبۋس" كارتوچكاسى  مەن QR-كود ارقىلى  80 تەڭگە تولەيدى. 

"ادىرنا" ۇلتتىق پورتالى.

پىكىرلەر
رەداكتسيا تاڭداۋى