جەلىدەگى اقپاراتتارعا زەر سالساق، قىتاي تەرمويادرولىق رەاكتوردىڭ تاعى دا ءبىر جاڭاشا مودەلىن ويلاپ تاپتى. بۇل قۇرىلعىدا جاساندى كۇننىڭ ەكسترەمالدى تەمپەراتۋرانى ۇستاپ تۇرۋى وزگە قۇرىلعىلارعا قاراعاندا 5 ەسە جوعارى كورسەتكىشتى كورسەتكەن.
«سينحۋا» مەملەكەتتىك اقپارات اگەنتتىگى ەكسپەريمەنتالدى جەتىلدىرىلگەن قۇرىلعىدا پلازمانىڭ تەمپەراتۋراسى 120 ميلليون گرادۋس تسەلسيگە جەتكەنىن حابارلادى. قۇرىلعى وسى تەمپەراتۋرانى 101 سەكۋند ۇستاپ تۇردى.
سونداي-اق، ەكسپەريمەنت بارىسىندا ماماندار قۇرىلعىداعى تەمپەراتۋرانى 160 ميلليون گرادۋسقا دەيىن دە ارتتىرعان. بىراق وسى جوعارى تەمپەراتۋرانى قۇرىلعىدا 20 سەكۋند ۇستاپ تۇرا الدى.
وتكەن جىلى قىتايلىق ماماندار EAST قۇرىلعىسىنىڭ ىشىندەگى پلازمانى 100 ميلليون گرادۋسقا دەيىن قىزدىردى. قۇرىلعىدا وسى تەمپەراتۋرانى 20 سەكۋندتان ارتىق ۇستاپ تۇرا المادى. ال بۇگىنگى ۋاقىتتا "قىتايلىق جاساندى كۇن" بۇرىنعىدان بەس ەسە جوعارى تەمپەراتۋرانى كورسەتىپ، رەكورد جاساپ وتىر.
وسىنداي ەكسپەريمەنتتەردى اقش، ەۋروپا، رەسەي جانە وڭتۇستىك كورەيا ەلدەرىنىڭ ماماندارى جۇرگىزەدى. سونداي-اق، قىتاي فرانتسياداعى ITER حالىقارالىق تەرمويادرولىق ەكسپەريمەنتتىك رەاكتورىنىڭ مەگاجوباسىنا قاتىساتىن 35 ەلدىڭ قاتارىندا. ءار ءتۇرلى ەلدەردەگى ەكسپەريمەنتتەردى تىكەلەي سالىستىرۋ قيىن، ويتكەنى قۇرىلعىلار ءارتۇرلى تاسىلدەرمەن جاسالعان ءارى ءار ءتۇرلى جاعدايدا جۇمىس جاسايدى.
بەكبولات قارجان،
«ادىرنا» ۇلتتىق پورتالى
