وزبەكستاننىڭ توتەنشە جاعدايلار مينيسترلىگىنىڭ قۇتقارۋشىلارى تۇركىستان وبلىسىنىڭ تاۋلارىندا جوعالىپ كەتكەن تۋريستەردى ىزدەۋگە جۇمىلدىرىلدى، دەپ حابارلايدى "ادىرنا" ۇلتتىق پورتالى.
"تاۋلاردا جوعالىپ كەتكەن تۋريستەردى ىزدەۋگە وزبەكستان توتەنشە جاعدايلار مينيسترلىگىنىڭ قۇتقارۋشىلارى جۇمىلدىرىلدى. ولار ۋگام وزەنىنىڭ بويىمەن، چارۆاك سۋ قويماسىنا قۇياتىن جەرگە دەيىنگى شەكارانى وزبەكستاننان تەكسەرىپ جاتىر", - دەدى توتەنشە جاعدايلار مينيسترلىگىنىڭ رەسمي وكىلى تالعات ءۋالي.
سايرام-وگەم شاتقالىندا جوعالىپ كەتكەن ەكى ءتۋريستتى ىزدەۋ جۇمىستارى جالعاسۋدا. ولار تاۋلى جەرلەرمەن جانە قاتتى وزەن اعىندارىمەن كۇردەلەنگەن جولداردى ءجۇرىپ وتكەن.
وسى ۋاقىتقا دەيىن ىزدەۋ جۇمىستارى 350 شاقىرىمنان اساتىن تاۋ شاتقالدارىندا جۇرگىزىلگەن. ۇشقىشسىز ۇشۋ اپپاراتتارىنىڭ كومەگىمەن 170 شاقىرىمعا جۋىق اۋماق زەرتتەلدى.
اەروۆيزۋالدى ىزدەستىرۋدى ۇزىندىعى 2 مىڭ شاقىرىمنان اساتىن «قازاۆياسپاس» اق تىكۇشاقتارى جاسادى.
ىزدەستىرۋ-قۇتقارۋ جۇمىستارىنا 218 ادام، 32 تەحنيكا، تجم، تۇركىستان وبلىسىنىڭ پد، جەرگىلىكتى اتقارۋشى ورگاندار، ۇقك شەكارا قىزمەتى، ۇلتتىق ۇلان ىشكى ىستەر مينيسترلىگى، ۇلتتىق ساياباق، الپينيزم فەدەراتسياسى، تجم «قازاۆياسپاس» اق 2 تىكۇشاعى جانە تۋىستارى ات سالىسۋدا.
"ادىرنا" ۇلتتىق پورتالى
