ەۋروپالىق قايتا قۇرۋ جانە دامۋ بانكى (ەقدب) ماڭىزدى مينەرالدار مەن جاسىل ەنەرگەتيكا سالالارىندا 2027 جىلعا دەيىن 7-8 ميلليارد ەۋرونى قۇرايتىن جوبالار پاكەتىن ازىرلەۋدە.
اقپاراتقا سايكەس، سامارقاندتا ورتالىق ازيا-ەۋروپا وداعىنىڭ ءبىرىنشى ءسامميتى ءوتىپ جاتىر. وندا شاۆكات ميرزيوەۆ ءسوز سويلەپ، وڭىرلەر اراسىنداعى ارىپتەستىك پەن ىنتىماقتاستىق تۋرالى «تولىق قۇقىقتى» كەلىسىم جاساۋدى ۇسىندى.
ەۋرووداق «Global Gateway» باعدارلاماسى اياسىندا ورتالىق ازيا ەلدەرىنە 12 ميلليارد ەۋرو كولەمىندە ينۆەستيتسيالىق پاكەت جاريالاعان. بۇل تۋرالى 4 ساۋىردە ورتالىق ازيا – ەۋرووداق سامميتىندە ەۋروپالىق كوميسسيا توراعاسى ۋرسۋلا فون دەر ليايەن مالىمدەدى.
ءوز سوزىندە ەۋروكوميسسيا باسشىسى ايماقتار اراسىنداعى ىنتىماقتاستىقتىڭ ءتورت باعىتىن اتاپ ءوتتى: ترانسكاسپي كوريدورى، كريتيكالىق مينەرالدار، «جاسىل» ەنەرگەتيكا جانە تسيفرلىق بايلانىس.
«الداعى پروگرەستى جەدەلدەتۋ ءۇشىن بۇگىن مەن قۋانىشپەن 12 ميلليارد ەۋرو كولەمىندە Global Gateway ينۆەستيتسيالىق پاكەتىن جاريالايمىن. بۇل ءبىزدىڭ وداق پەن مۇشە مەملەكەتتەرىنىڭ ينۆەستيتسيالارىن بىرىكتىرەدى»، — دەدى ۋرسۋلا فون دەر ليايەن.
ونىڭ ايتۋىنشا، بۇل «ەۋروپالىق كوماندالىق ءتاسىل»، جانە جاڭا ينۆەستيتسيالىق پاكەت ورتالىق ازيادا جاڭا جوبالار سەرياسىنىڭ باستالۋىنا نەگىز بولادى.
«بۇل شىنىمەن دە ءبىزدىڭ ەجەلگى دوستىعىمىزدا جاڭا ءداۋىردىڭ باستاماسى»، — دەپ اتاپ ءوتتى ەۋروكوميسسيا باسشىسى.
12 ميلليارد ەۋرو كولەمىندەگى ينۆەستيتسيالىق پاكەت ءتورت سالا بويىنشا بولىنەدى: كولىك (3 ميلليارد ەۋرو), كريتيكالىق مينەرالدار (2,5 ميلليارد ەۋرو), گيدروەنەرگەتيكا جانە كليمات (6,4 ميلليارد ەۋرو), سپۋتنيكتىك ينتەرنەت (100 ميلليون ەۋرو).
سونىمەن قاتار، ەۋروپالىق قايتا قۇرۋ جانە دامۋ بانكى (ەقدب) 2027 جىلعا دەيىن كريتيكالىق مينەرالدار مەن جاڭارتىلاتىن ەنەرگيا سياقتى سالالاردى قامتيتىن جوبالار پاكەتىن 7-8 ميلليارد ەۋرو كولەمىندە ازىرلەۋدە.
ەۋروپالىق ينۆەستيتسيالىق بانك (ەيب) تاجىكستان، قىرعىزستان جانە وزبەكستانمەن ءتورت تۇسىنىستىك مەموراندۋمىن جاساسىپ، تۇراقتى كولىك، سۋ رەتتەۋ جانە كليمات وزگەرىسىنە بەيىمدەلۋ ماسەلەلەرىنە 365 ميلليون ەۋرو بولۋگە دايىندالىپ جاتىر.
