وزبەكستاننىڭ انديجان وبلىسىندا رەسەي اسكەرىنىڭ ساپىندا سوعىسقان ازاماتقا قاتىستى سوت ۇكىم شىقتى. بۇل تۋرالى Uznews.uz جازدى، دەپ حابارلايدى «ادىرنا» ءتىلشىسى.
ءىس ماتەريالدارىنا سايكەس، 2022 جىلدىڭ جەلتوقسانىندا 25 جاستاعى ي.ح. تابىس تابۋ ماقساتىندا رەسەيگە بارىپ، كۋرەر بولىپ جۇمىسقا ورنالاسقان. 2023 جىلدىڭ قاڭتارىندا ول ۇستالىپ، ەسىرتكى قۇرالدارىنىڭ زاڭسىز اينالىمى ءۇشىن 8 جىلعا باس بوستاندىعىنان ايىرىلعان.
2024 جىلدىڭ تامىزىندا كولونيادا وتىرعان كەزىندە ي.ح. رەسەي قارۋلى كۇشتەرىمەن كەلىسىمشارت جاساسىپ، ۋكراينا اۋماعىنداعى ۇرىس قيمىلدارىنا جىبەرىلگەن. دونەتسك ماڭىنداعى شايقاستار بارىسىندا ول اۋىر جاراقات العان. كەيىن اسكەري گوسپيتالداردا ۇزاق ەم قابىلداپ، 2025 جىلدىڭ قىركۇيەگىندە وزبەكستانعا ورالعان. ەلگە كەلگەن سوڭ قۇقىق قورعاۋ ورگاندارى ونى قايتا ۇستاعان.
انديجان وبلىسىنىڭ جالاكۋدۋك اۋداندىق قىلمىستىق ىستەر جونىندەگى سوتى ي.ح.-نى وزبەكستان قىلمىستىق كودەكسىنىڭ 154-بابىنىڭ 1-بولىگى («جالدامالىلىق») بويىنشا كىنالى دەپ تانىپ، 5 جىلعا باس بوستاندىعىنان ايىرۋ جازاسىن تاعايىنداعان. الايدا سوت ايىپتالۋشىنىڭ جاسىن، وزبەكستاندا بۇرىن سوتتالماعانىن، كىناسىن مويىنداۋىن، سونداي-اق العان جاراقاتتارىنىڭ سالدارىنان دەنساۋلىعىنىڭ اۋىر جاعدايىن ەسكەرىپ، جازانى ەكى جىلدىق سىناق مەرزىمىمەن شارتتى جازاعا الماستىرعان.
ايتا كەتەيىك، قاراشادا وزبەكستاننىڭ مەملەكەتتىك قاۋىپسىزدىك قىزمەتى 2022 جىلدان بەرى ەل ازاماتتارىنىڭ شەتەلدەگى قارۋلى قاقتىعىستارعا قاتىسۋ فاكتىلەرى بويىنشا 338 قىلمىستىق ءىس قوزعالعانىن مالىمدەگەن ەدى.
