اقشا دا ادامدى اراق سياقتى ماس قىلادى ەكەن. قازاقستاندا وسىنداي "ماستار" تىم كوبەيىپ كەتتى. قولدارىنا ءتۇسىپ قالۋدان ءبىرتۇرلى قورقاسىڭ.
قازىردە جاس ءانشى كوپ. وڭشەڭ "جۇلدىز". قازاق اسپانىنا قالاي سىيىپ تۇر دەپ تاڭعالاسىڭ. ال كوبىنىڭ ءانىن تىڭداساڭىز... اۋەنى – ازعىن، ءسوزى – سوراقى. اياقتارى –جەردە، دەمى – كوكتە. قولدا – ميكروفون... بار كاسىپتەرى ەل-جۇرتتان اقشا جيناۋ. بيزنەستىڭ ەڭ وڭاي جولى وسى شىعار. ءالىڭ جەتپەسە انمەن وينا دەپ ولارعا كىم ايتتى ەكەن؟!
ورىستاردا سىندى دا، ماراپاتتى دا قابىلداي الاتىن مىنەز بار. ولار پۋشكيننىڭ جۇرگىشتىگىن، لەرمونتوۆتىڭ سۋماقايلىعىن، نەكراسوۆتىڭ الاياقتاۋ كارتا قۇمارلىعىن، دوستوەۆسكيدىڭ قويانشىق اۋرۋىن، ماياكوۆسكيدىڭ ەكى ادامعا ورتاق ءبىر ايەل ۇستاعانىن، ەسەنيننىڭ سيفيليسپەن اۋىرعانىن، رۋبتسوۆتىڭ ىشكىش بوپ، كوڭىلدەسى تۇنشىقتىرىپ ولتىرگەنىن جاسىرىپ، جابا ما؟ جوق! اشىق ايتادى. ويتكەنى، قانشاما ۇلى تۇلعا بولسا دا – ءناتى ادام. سوندىقتان دا، ولاردىڭ بەتىنە شىركەۋ ءتۇسىپ جاتقان جوق.
بىزدە شە؟ اتاي كورمەڭىز. وڭشەڭ شىبىق تيمەس شىڭق ەتپە. كەرەمەت، عاجاپ، كلاسسيك، ۇلى... قاعىس ءسوز ايتساڭ قالپاعىڭدى قاعىپ تۇسىرەدى. ۇستەرىنە شىبىن تۇرماق شاڭ قونباۋى كەرەك.
توي-توپىردا جاستارعا جۇرت سياقتى "باقىتتى بولىڭدار" دەپ تىلەك ايتامىن. باقىتتىڭ نە ەكەنىن شىنداپ كەلگەندە ءوزىم دە بىلمەيمىن. بالكىم، ءبىزدىڭ جاقتا جوق زات شىعار؟!
ءۇش رەت كوماعا ءتۇسىپ، ەس-ءتۇسسىز جاتتىم. الدى سەگىز، سوڭى ەكى كۇن. اللەكەم ءارى ويلانىپ، بەرى ويلانىپ مەنى و دۇنيەدە ەش كادەسىنە جاراتا الماعان سوڭ ءتىرى قالدىرعان سياقتى.
ەسىل جاعاسىندا ۇزاقتى كۇن قىدىردىم. تولقىندى تولقىن جەلكەلەپ، ءولتىرىپ جاتتى...
امان-ساۋلىق سۇراسقان ءبىر تانىسقا: ء"جۇرىپ جاتىرمىز، ۋاقىتشا", – دەپ ەم. شوشىپ كەتتى.
– قالايشا ۋاقىتشا؟ – دەپ.
وعان نە ايتۋعا بولادى؟
حالىقتى جوقشىلىق ەمەس، توقشىلىق قۇرتادى. ازدىرادى. بۇل – ەرتە دۇنيە تاريحىنان ءمالىم قۇبىلىس.
جىلاعىم كەلگەن. جاس تابا المادىم...
"ادىرنا" ۇلتتىق پورتالى
