Aqşa da adamdy araq siiaqty mas qylady eken. Qazaqstanda osyndai "mastar" tym köbeiıp kettı. Qoldaryna tüsıp qaludan bırtürlı qorqasyŋ.
Qazırde jas änşı köp. Öŋşeŋ "jūldyz". Qazaq aspanyna qalai syiyp tūr dep taŋǧalasyŋ. Al köbınıŋ änın tyŋdasaŋyz... Äuenı – azǧyn, sözı – soraqy. Aiaqtary –jerde, demı – kökte. Qolda – mikrofon... Bar käsıpterı el-jūrttan aqşa jinau. Biznestıŋ eŋ oŋai joly osy şyǧar. Älıŋ jetpese änmen oina dep olarǧa kım aitty eken?!
Orystarda syndy da, marapatty da qabyldai alatyn mınez bar. Olar Puşkinnıŋ jürgıştıgın, Lermontovtyŋ sumaqailyǧyn, Nekrasovtyŋ alaiaqtau karta qūmarlyǧyn, Dostoevskiidıŋ qoianşyq auruyn, Maiakovskiidıŋ ekı adamǧa ortaq bır äiel ūstaǧanyn, Eseninnıŋ sifilispen auyrǧanyn, Rubsovtyŋ ışkış bop, köŋıldesı tūnşyqtyryp öltırgenın jasyryp, jaba ma? Joq! Aşyq aitady. Öitkenı, qanşama ūly tūlǧa bolsa da – nätı adam. Sondyqtan da, olardyŋ betıne şırkeu tüsıp jatqan joq.
Bızde şe? Atai körmeŋız. Öŋşeŋ şybyq times şyŋq etpe. Keremet, ǧajap, klassik, ūly... Qaǧys söz aitsaŋ qalpaǧyŋdy qaǧyp tüsıredı. Üsterıne şybyn tūrmaq şaŋ qonbauy kerek.
Toi-topyrda jastarǧa jūrt siiaqty "Baqytty bolyŋdar" dep tılek aitamyn. Baqyttyŋ ne ekenın şyndap kelgende özım de bılmeimın. Bälkım, bızdıŋ jaqta joq zat şyǧar?!
Üş ret komaǧa tüsıp, es-tüssız jattym. Aldy segız, soŋy ekı kün. Allekem ärı oilanyp, berı oilanyp menı o düniede eş kädesıne jarata almaǧan soŋ tırı qaldyrǧan siiaqty.
Esıl jaǧasynda ūzaqty kün qydyrdym. Tolqyndy tolqyn jelkelep, öltırıp jatty...
Aman-saulyq sūrasqan bır tanysqa: "Jürıp jatyrmyz, uaqytşa", – dep em. Şoşyp kettı.
– Qalaişa uaqytşa? – dep.
Oǧan ne aituǧa bolady?
Halyqty joqşylyq emes, toqşylyq qūrtady. Azdyrady. Būl – erte dünie tarihynan mälım qūbylys.
Jylaǧym kelgen. Jas taba almadym...
"Adyrna" ūlttyq portaly
Ūqsas jaŋalyqtar
