الماتىدا "ۇلتتىق قۇندىلىقتار اكادەمياسى" قب العاشقى عىلىمي كەڭەسى ءوتتى

3382
Adyrna.kz Telegram

ۇلت ۇستازى احمەت بايتۇرسىنۇلى: "ۇلت جۇمىسى ۇلكەن جۇمىس، ۇلكەن جۇمىسقا كوپ جۇمىسكەر كەرەك" دەپ ەدى. جوعالىپ بارا جاتقان ۇلتتاردىڭ قاتارىنان ەمەس، جوعارلاپ بارا جاتقان ۇلتتاردىڭ قاتارىنان كورىنۋ ءۇشىن جان الىپ، جان بەرىپ، ەل ءۇشىن ەمىرەنە ەڭبەك ەتۋ ءلازىم. وسى ماقساتتىڭ ورىنداۋشىلارى باس قوسقان "ۇلتتىق قۇندىلىقتار اكادەمياسى" قوعامدىق بىرلەستىگىنىڭ العاشقى عىلىمي كەڭەسى الماتىدا ءوتتى.

قر وقۋ-اعارتۋ ءبىرىنشى ۆيتسە ءمينيسترى شولپان تاڭاتقىزى ونلاين فورماتتا ءسوز سويلەپ، ءمينيستردىڭ قۇتتىقتاۋىن جەتكىزدى. ول "بالا تاربيەسىنىڭ الاڭداۋشىلىق تۋعىزىپ وتىرعانىن، بۇل باعىتتا ىستەلەر ءىستىڭ كوپ ەكەنىن" تىلگە تيەك ەتىپ اكادەميا قىزمەتىنە ساتتىلىك تىلەدى.

پەداگوگيكا عىلىمدارىنىڭ دوكتورى، پروفەسسور بەرىكجان ايتقۇلۇلى بۇگىنگى قوعامنىڭ ەڭ وزەكتى ماسەلەلەرىن جىپكە ءتىزىپ، ونى شەشۋ ءۇشىن بىرلەسە جۇيەلى ءارى ناقتى جۇمىس ىستەۋگە شاقىردى.

پەداگوگيكا عىلىمدارىنىڭ دوكتورى، پروفەسسور ورازباەۆا فاۋزيا اپايىمىز ۇلتتىق كودىمىز بولعان قازاق ءتىلىنىڭ ءمان-ماڭىزى، حال-كۇيى، قولدانىسى مەن ماسەلەلەرى، ساقتاۋ مەن دامىتۋ جولدارىنا باعا بەرىپ، ۇتىمدى ۇسىنىستارىن ايتتى.

ودان كەيىن ءسوز العان قازاقستان پەداگوگيكالىق عىلىمدار اكادەمياسىنىڭ پرەزيدەنتى اسقاربەك قۇسايىنوۆ، قازاقستاننىڭ ەڭبەك ەرى اياگۇل تورەقىزى، قوعام قايراتكەرى، عالىم اسىلى وسمان، ت،ب ۇلت جاناشىرلارى مەن بايانولگەي، تاشكەنتتەگى قانداستارىمىز اۋىر جۇك پەن امانات ارقالاعان جاڭا قوعامدىق ۇيىمعا تىلەك پەن ۇسىنىستارىن ايتتى.

كۇرمەۋى قيىن، كۇردەلى ماسەلەلەرى كۇن سايىن كوبەيىپ بارا جاتقان قازاق قوعامىنىڭ ۇلتتىق رۋحى مەن ساناسىن وياتىپ، ۇرپاق تاربيەسىنە حالىقتىق قۇندىلىقتاردىڭ مەيلىنشە مولىراق پايدالانىلۋى مەن ناسيحاتتالۋىنا دانەكەر بولىپ، مەملەكەتتىك ساياساتتا ۇلتتىق يدەولوگيانىڭ ىسكە اسۋى، ءبىلىم مازمۇنىن ۇلتتىق سيپاتتا بايىتۋ، ت.ب باعىتتاردا جۇيەلى جۇمىس ىستەۋگە بىلەك سىبانا كىرىسكەن اكادەميا جۇمىسىنىڭ ءساتتى، تابىستى بولۋىنا تىلەكتەسپىز!

"ادىرنا" ۇلتتىق پورتالى 

پىكىرلەر