1,2 ميلليون: اياگوز اكىمى پارا العانى ءۇشىن سوتتالدى

2086
Adyrna.kz Telegram

شىعىس قازاقستان وبلىسى اياگوز قالاسىنىڭ اكىمى ءىرى كولەمدە پارا العانى ءۇشىن 4,5 جىلعا باس بوستاندىعىنان ايىرىلدى، دەپ حابارلايدى «ادىرنا» ۇلتتىق پورتالى.

كۇدىكتى اياگوز قالاسىنىڭ اكىمى بولىپ جۇمىس ىستەپ جۇرگەن كەزدە 2020 جىلدىڭ 16 جانە 17 قىركۇيەگىندە ەكى كەزەڭدە «كوركەم» جك-نەن 1,2 ميلليون تەڭگە كولەمىندە پارا العان. بۇل تۋرالى اياگوز اۋداندىق سوتى Facebook پاراقشاسىندا جازدى.

اكىم قاراجاتتى العاننان كەيىن ءوزىنىڭ جۇمىس بولمەسىندە ۇستالدى.

قىلمىستىق ءىستى اياگوز اۋداندىق سوتى قىلمىستىق كودەكستىڭ 366-بابىنىڭ ەكىنشى بولىگى بويىنشا قارادى.

پروكۋرور كۇدىكتىنى 5 جىلعا باس بوستاندىعىنان ايىرۋدى سۇرادى. بىراق اكىم ءوز كىناسىن مويىنداماي، بۇل قاراجات نەسيەگە الىنعانىن ءتۇسىندىردى.

سوتتا قۋانىش ءازىحانوۆتىڭ كىناسى كۋاگەرلەردىڭ ايعاقتارىمەن تولىق دالەلدەنىپ، ونىڭ نەسيەگە اقشا الۋ تۋرالى دالەلدەرى تەرىسكە شىعارىلدى.

قىلمىستىق كودەكستىڭ 2-بولىگىنىڭ 366-بابىنىڭ سانكتسياسىندا 3 جىلدان 7 جىلعا دەيىنگى مەرزىمگە باس بوستاندىعىنان ايىرۋ تۇرىندەگى جازا قاراستىرىلعان، سوت قىلمىستىق جاۋاپتىلىقتى جەڭىلدەتەتىن ءمان-جايلار انىقتاعان جوق جانە قىلمىس جاساعان ادامنىڭ قىلمىس جاساۋى انتتى بۇزىپ، اۋىرلاتاتىن ءمان-جاي دەپ تانىلدى (قىلمىستىق كودەكستىڭ 54-بابى)...

جوعارىدا ايتىلعانداردىڭ نەگىزىندە سوت مەملەكەتتىك قىزمەتتەگى لاۋازىمداردا جۇمىس ىستەۋ قۇقىعىنان ءومىر بويىنا ايىرا وتىرىپ، 4 جىل 5 ايعا باس بوستاندىعىنان ايىرۋ جازاسىن تاعايىندادى.

ۇكىم زاڭدى كۇشىنە ەنگەن جوق جانە جوعارى ساتىعا شاعىمدانۋعا بولادى.

"ادىرنا" ۇلتتىق پورتالى

پىكىرلەر