ساۋد ارابياسى كورولدىگىنىڭ دەنساۋلىق ساقتاۋ مينيسترلىگى بيىلعى قاجىلىققا دايىندىق شەڭبەرىندەگى ارنايى تالاپتاردى جاريالادى دەپ حابارلايدى «ادىرنا» ۇلتتىق پورتالى قازاقستان مۇسىلماندارىنىڭ ءدىني باسقارماسىنا سىلتەمە جاساپ.
وسى رەتتە الەمدەگى پاندەميالىق جاعدايداعى «قاجىلىق-2021» ماۋسىمىنداعى ساۋد ارابيا تاراپىنىڭ نەگىزگى تالاپتارىنا نازار اۋدارۋ قاجەت:
— بيىلعى قاجىلىق ماۋسىمىنداعى قاجىلار سانى 60 مىڭ ادام دەپ بەلگىلەنگەن.
— قاجىلىق جاساۋعا 18-60 جاس ارالىعىنداعى ازاماتتار ءوتىنىش بەرە الادى.
— ساۋد ارابياسىندا رەسمي بەكىتىلگەن ۆاكتسينا تۇرلەرىنىڭ (Pfizer-BioNTech, AstraZeneca, Johnson&Johnson جانە Moderna) ەكى دوزاسىن قابىلداۋ تالاپ ەتىلەدى. ەكىنشى دوزانى كورولدىككە بارۋدان 14 تاۋلىك بۇرىن قابىلداۋى ءتيىس.
— شەت ەلدەردەن كەلگەن كىسىلەرگە قاجىلىق قۇلشىلىعىنا قاتىسى جوق وزگە ايماقتارعا بارۋىنا تىيىم سالىنادى.
سونداي-اق ءار قاجى جوعارىدا اتالعان ۆاكتسينالاردىڭ ءبىرىن قابىلداعانى تۋرالى ءوز ەلىنىڭ قۇزىرەتتى ورگاندارىنان انىقتاما الۋى جانە ونى ساۋد ارابياسىنىڭ شەت مەملەكەتتەردەگى ەلشىلىكتەرىندە زاڭداستىرۋى كەرەك. بۇعان قوسىمشا ءار قاجىدان كورولدىككە كەلگەن كەزدە 72 ساعاتقا جارامدى تەرىس ناتيجەلى پتر-تەست انىقتاماسىن دا كورسەتۋ تالاپ ەتىلەدى.
قاجىلار مەككە ايماعىندا ءبىر ورىننان ەكىنشى ورىنعا كوشكەن ۋاقىتتا بارلىق دەنساۋلىق ساقتاۋ شارالارىن قاتاڭ ساقتاۋى ءتيىس.
سونداي-اق بەكىتىلگەن ەرەجەلەرگە تولىق باعىنۋ قاجەت. الايدا «قاجىلىق-2021» ماۋسىمىندا قانداي مەملەكەتتەن قانشا ادام شاقىرىلاتىنى جايلى جاڭالىقتى ساۋد ارابيا بيلىگى ازىرگە تاراتپاي وتىر.
«ادىرنا» ۇلتتىق پورتالى.
