ءبىرىنشى مامىردان باستاپ ەرىكتى زەينەتاقى جارنالارىن مەرزىمىنەن بۇرىن الاتىندار ءتىزىمى كەڭەيدى. بۇل تۋرالى بىرىڭعاي جيناقتاۋشى زەينەتاقى قورى مالىمدەدى، دەپ حابارلايدى «ادىرنا» ۇلتتىق پورتالى Sputnik قازاقستان سايتىنا سىلتەمە جاساپ.
ەرىكتى زەينەتاقى جارناسى – سالىمشىلاردىڭ ءوز باستاماسىمەن زەينەتاقى قورىنداعى شوتىنا اۋداراتىن اقشاسى.
زەينەتاقىمەن قامسىزداندىرۋ تۋرالى زاڭعا سايكەس، ەرىكتى زەينەتاقى جارناسىن مەرزىمىنەن بۇرىن الۋعا مىنا ساناتتاعى ادامدارعا رۇقسات ەتىلەدى:
– ەلۋ جاسقا تولعان;
– مۇگەدەكتەرگە;
– قازاقستان شەگىنەن تىسقارى جەرگە تۇراقتى تۇرۋعا كەتەتiن نەمەسە كەتكەن شەتەلدىكتەر مەن ازاماتتىعى جوق ادامدار (كەتۋ نيەتiن نەمەسە فاكتىسىن راستايتىن قۇجاتتاردى ۇسىنعان جاعدايدا);
– بجزق-دا جانە (نەمەسە) ەرىكتى جيناقتاۋشى زەينەتاقى قورىندا ەرىكتى زەينەتاقى جارنالارى مەن ولارعا ەسەپتەلگەن ينۆەستيتسيالىق كىرىس سوماسى شەگىندە كەمىندە 5 جىل زەينەتاقى جيناعى بار ادامدار.
سوڭعى سانات تىزىمگە بيىل مامىردا عانا ەندى. ەندى زەينەتاقى قورىنا ەرىكتى زەينەتاقى جارنالارىن كەمىندە بەس جىل اۋدارعان ازاماتتار شوتتاعى اقشاسىن مەرزىمىنەن بۇرىن الۋعا قۇقىلى.
ماسەلەن، ەگەر سالىمشى ەزج-نى 20 نەمەسە 30 جاستان باستاپ اۋدارسا، تيىسىنشە 25 نەمەسە 35 جاسقا تولعاندا ءوزىنىڭ العاشقى تولەمىن الادى.
ايتا كەتسەك، 2021 جىلدىڭ 1 مامىرىنان ەرىكتى زەينەتاقى جارنالارىن ەسەپكە الۋ ءۇشىن شوتتار اۆتوماتتى تۇردە اشىلادى. جەكە زەينەتاقى شوتتارىن اشۋعا بجزق-عا تۇسكەن العاشقى ەرىكتى زەينەتاقى جارناسى نەگىز بولادى. ياعني سالىمشىعا كەڭسەگە بارۋدىڭ قاجەتى جوق.
ەزج-نى جەكە تۇلعا ءوزى ءۇشىن، جەكە نەمەسە زاڭدى تۇلعالار باسقا بىرەۋ ءۇشىن اۋدارا الادى. بۇل رەتتە جارنا مولشەرى مەن مەرزىمدىلىگىن سالىمشى ءوزى ايقىندايدى.
ەرىكتى زەينەتاقى جارنالارىن ەكىنشى دەڭگەيلى بانكتەر نەمەسە قازپوشتا ارقىلى اۋدارۋعا بولادى. كەيبىر بانكتەردە زەينەتاقى جارناسىن ونلاين ء(موبيلدى قوسىمشا نەمەسە وزىنە-ءوزى قىزمەت كورسەتۋ تەرمينالدارى) اۋدارۋ مۇمكىندىگى قاراستىرىلعان.
بۇدان بولەك، بجزق اقپاراتىنشا، ءوز پايداسىنا ەرىكتى زەينەتاقى جارناسىن تۇراقتى اۋدارىپ تۇرۋ ءۇشىن جۇمىس بەرۋشىنىڭ اتىنا ءوتىنىش جازۋعا دا بولادى. سونىڭ نەگىزىندە جۇمىس بەرۋشى جارنانى ءوتىنىش يەسىنىڭ نە ءۇشىنشى تۇلعانىڭ شوتىنا تۇراقتى تۇردە اۋدارىپ وتىرادى.
"ادىرنا" ۇلتتىق پورتالى
(فوتو Aikyn.kz سايتىنان)
