ءۇندىستان ساڭىراۋقۇلاق ينفەكتسياسىنان تۋىنداعان اۋرۋ — مۋكورميكوزبەن كۇرەسۋدە دەپ حابارلايدى «ادىرنا» ۇلتتىق پورتالىنىڭ ءتىلشىسى «حابار 24-كە» سىلتەمە جاساپ.
ەپيدەميا رەسمي تۇردە وسى ەلدىڭ جەتى شتاتىندا جاريالانعان. جالپى بۇل ەلدە «قارا زەڭ» دەپ اتالاتىن ينفەكتسيانى 9 مىڭنان استام ادام جۇقتىرعان. 220-دان استام ادام اۋرۋدان كوز جۇمعان.
BBC News-ءتىڭ حابارلاۋىنشا، بۇل ينفەكتسيادان ءولىم كورسەتكىشى 50 پايىزعا جەتۋى مۇمكىن. مۋكورميكوزبەن اۋىرعان ادامداردىڭ كەيبىر جاعدايلاردا شىرىشتى قابىعىنىڭ زاقىمدانۋىنا بايلانىستى كوزدەرىن الىپ تاستايدى، سەبەبى ول ميعا زاقىم كەلتىرۋى ىقتيمال.
قازىرگى تاڭدا ەلدە ءدارى-دارمەكتىڭ جەتىسپەۋشىلىگىنە بايلانىستى ءۇندىستان ۇكىمەتى ءدارى-دارمەك شىعارۋعا تاعى بەس فارماتسەۆتيكالىق كومپانياعا ليتسەنزيا بەرۋ تۋرالى شەشىم قابىلداعان. اۋرۋحانالاردا شۇعىل تۇردە قوسىمشا بولىمدەر اشىلۋدا.
جەرگىلىكتى بيلىك ينفەكتسيانىڭ تارالۋىن باقىلاۋدا ۇستاپ وتىرعاندىعىن ايتتى. بۇل ينفەكتسيانى كوبىنە يممۋنيتەتى ءالسىز ادامدار، اسىرەسە، بۇرىن كوروناۆيرۋسپەن جانە ديابەتپەن اۋىرعاندار جۇقتىرادى.
«ادىرنا» ۇلتتىق پورتالى.
