كوروناۆيرۋس جۇقتىرعاندار كوبەيۋى مۇمكىن

2263

نۇر-سۇلتاندا 25 مامىرعا قاراي كوروناۆيرۋس جۇقتىرعان ادامداردىڭ سانى كوبەيۋى مۇمكىن. قوعامدىق دەنساۋلىق ساقتاۋ باسقارماسىنىڭ باسشىسى ءاليا رۇستەموۆا وسىنداي بولجام جاسادى، دەپ حابارلايدى «ادىرنا» ۇلتتىق پورتالى Sputnik قازاقستان سايتىنا سىلتەمە جاساپ.

ونىڭ ايتۋىنشا، سوڭعى ءبىر اپتانىڭ ىشىندە COVID-19 جۇقتىرۋ جاعدايلارى ءبىرشاما ازايدى. ستاتسيونارعا ءتۇسىپ جاتقان ناۋقاستاردىڭ سانى دا كوپ ەمەس.

«دەگەنمەن قاۋىپ ءالى دە بار. سەبەبى ساۋدا ورتالىقتارى اشىق، ادامدار ءبىر-بىرىمەن تىعىز قارىم-قاتىناس جاساپ ءجۇر. اسىرەسە، مەرەكە كۇندەرى جاقىن ارالاستى. 1 مامىردا، ودان كەيىن 9 مامىردا دەمالدىق، قىدىردىق.14 كۇننەن كەيىن، شامامەن 25-ىنە قاراي ناۋقاستاردىڭ سانى قايتادان ءوسىپ، ينفەكتسيا ءورشىپ كەتۋى مۇمكىن. الايدا وسى اپتادا ۆيرۋستى جۇقتىرعاندار ءبىرشاما ازايدى»، - دەدى رۇستەموۆا Sputnik قازاقستاننىڭ مۋلتيمەديالىق ءباسپاسوز ورتالىعىندا وتكەن بريفينگتە.

باسقارما باسشىسى استانادا كوروناۆيرۋسقا قارسى ۆاكتسينا سالدىرتاتىن ادامداردىڭ ازايعانىن دا مالىمدەدى.

«ءساۋىر-مامىر ايلارىندا ادام كوپ كەلدى. ءبىر تاۋلىكتە ەكپەنىڭ ءبىرىنشى كومپونەنتى شامامەن 6-7 مىڭ ادامعا سالىناتىن. بۇگىندە ايتارلىقتاي ازايدى. وتكەن تاۋلىكتە 2,5 ادام عانا ۆاكتسينا سالدىردى. جالپى رەسپۋبليكا بويىنشا ەكپە العىسى كەلەتىندەردىڭ سانى ازايىپ كەلەدى. سەبەبىن بىلمەيمىن. بالكىم، ءساۋىر ايىندا ۆاكتسينانىڭ قاجەتتىلىگىن تۇسىنەتىن حالىقتى قامتىدىق»، - دەپ اتاپ ءوتتى رۇستەموۆا.

ايتا كەتەيىك، قازاقستاندا سوڭعى ءبىر تاۋلىكتىڭ ىشىندە 2 433 ادامنىڭ كوروناۆيرۋس جۇقتىرعانى پتر-تەستپەن راستالدى. سونىڭ ىشىندە استانادا 439 ناۋقاس تىركەلدى.

بۇگىندە نۇر-سۇلتاندا ۆاكتسينالاۋ پۋنكتتەرى ساۋدا ورتالىقتارىندا اشىلعان. ولار – Mega Silk Way, Keruen, «حان شاتىر»، «ابۋ-دابي پلازا»، «ازيا پارك»، «بيگ شانحاي»، ورتالىق بازار، «ارتەم» مەن «الەم».

"ادىرنا" ۇلتتىق پورتالى

پىكىرلەر
ۇقساس جاڭالىقتار