قازاقستاندا ءموبيلدى ينتەرنەت پەن ۇيالى بايلانىس قىزمەتتەرىنىڭ باعاسىن تومەندەتۋدى سۇراپ، پەتيتسيا جاريالادى، دەپ حابارلايدى "ادىرنا" ۇلتتىق پورتالى.
پەتيتسيا GosRating.com پلاتفورماسىندا جاريالانعان. قۇجات اۆتورى رەتىندە وسماە اسانوۆ ەسىمدى ازامات كورسەتىلگەن. ءوتىنىش باسەكەلەستىكتى قورعاۋ جانە دامىتۋ اگەنتتىگىنە، سونداي-اق تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنە جولدانعان.
پەتيتسيا اۆتورلارى ۇيالى بايلانىس وپەراتورلارىنىڭ قازىرگى تاريفتىك ساياساتىن نەگىزسىز دەپ باعالايدى. ولاردىڭ ايتۋىنشا، وپەراتورلار جابدىق ساتىپ الۋ شىعىندارى مەن سالىقتىق اۋىرتپالىقتى، سونىڭ ىشىندە قوسىلعان قۇن سالىعىنىڭ ءوسۋىن العا تارتىپ، تاريفتەردى جىل سايىن كوتەرىپ كەلەدى. الايدا بايلانىس ساپاسىنىڭ ايتارلىقتاي جاقسارۋى بايقالمايدى.
«نارىقتىق ءوزىن-ءوزى رەتتەۋ ءوز تيىمدىلىگىن كورسەتە المادى. شىنايى باسەكەنىڭ بولماۋى وپەراتورلاردىڭ ءبىر مەزگىلدە ارەكەت ەتۋىنە اكەلىپ وتىر. بارلىق وپەراتورلاردا باعانىڭ قاتار ءوسۋى تۇتىنۋشىلاردى تاڭداۋ مۇمكىندىگىنەن ايىرىپ، تاريفتەر بويىنشا جاسىرىن كەلىسىم بار ەكەنىن كورسەتەدى»، – دەلىنگەن پەتيتسيا ماتىنىندە.
سونداي-اق اۆتورلار مەملەكەتتىك قىزمەتتەر، ونلاين-بانكينگ پەن ءبىلىم بەرۋ سالاسىنىڭ كەڭىنەن تسيفرلاندىرىلۋىن ەسكەرە وتىرىپ، ينتەرنەتكە قول جەتكىزۋ ارتىقشىلىق ەمەس، نەگىزگى قاجەتتىلىك ەكەنىن اتاپ وتكەن. وسىعان بايلانىستى مەملەكەت ازاماتتاردى جەكە كومپانيالاردىڭ نەگىزسىز باعا وسىرۋىنەن قورعاۋعا مىندەتتى دەپ سانايدى.
پەتيتسيادا قولدانىستاعى تاريفتەردى قىزمەت ساپاسى مەن حالىقتىڭ ساتىپ الۋ قابىلەتىنە ساي دەڭگەيگە دەيىن تومەندەتۋ، ۇيالى بايلانىس پەن ينتەرنەتتى الەۋمەتتىك ماڭىزى بار قىزمەت رەتىندە تانۋ، قازاقستان مەن باسقا ەلدەردەگى بايلانىس باعالارىنا رەسمي سالىستىرمالى تالداۋ جۇرگىزۋ تالاپتارى كورسەتىلگەن.
