سەنات دەپۋتاتتارى مەكتەپ كىتاپحانالارىندا جۇمىس ىستەيتىن قىزمەتكەرلەردىڭ جالاقىسىن ارتتىرۋ ماسەلەسىن كوتەردى، دەپ حابارلايدى «ادىرنا» ۇلتتىق پورتالى Sputnik قازاقستان سايتىنا سىلتەمە جاساپ.
بۇگىن سەناتتىڭ جالپى وتىرىسىندا سەناتور دينار نوكەتاەۆا مەكتەپتەگى كىتاپحاناشىلاردىڭ جالاقىسىن ارتتىرۋ ماسەلەسىن كوتەردى. ونىڭ ايتۋىنشا، بۇگىندە مادەنيەت سالاسىنا قارايتىن، ياعني جالپى حالىققا قىزمەت كورسەتەتىن كىتاپحانا قىزمەتكەرلەرىنىڭ جالاقىسى 30-50 پروتسەنتى كوتەرىلدى. بىراق مەكتەپتەگى كىتاپحاناشىلاردىڭ ەڭبەكاقىسى سول كۇيىندە قالدى. ال جاس ۇرپاقتى تاربيەلەۋ مەن ۇلتتىق قۇندىلىقتاردى ساقتاۋ تۇرعىسىندا وسى مامانداردىڭ اتقاراتىن ءرولى زور. وسى ورايدا دەپۋتات ءبىلىم جانە عىلىم مينيسترىنەن ءبىلىم ۇيىمدارىنداعى كىتاپحاناشىلاردىڭ جالاقىسى باسقا كىتاپحاناشىلارمەن قاشان تەڭەسەتىنىن سۇرادى.
ءبىلىم جانە عىلىم ءمينيسترى اسحات ايماعامبەتوۆتىڭ ايتۋىنشا، بۇگىندە مەكتەپ كىتاپحانالارىندا 13,5 مىڭ ادام جۇمىس ىستەيدى. ولاردىڭ بارلىعى ءبىلىم قىزمەتكەرلەرى بولىپ سانالادى. سول سەبەپتى مادەنيەت سالاسىنداعى كىتاپحاناشىلاردىڭ جالاقىسىن ارتتىرۋ شارالارىنا ىلىكپەي قالدى.
«ءبىلىم سالاسىندا قىزمەت ەتەتىن 13,5 مىڭ كىتاپحاناشىنىڭ جالاقىسى مادەنيەت سالاسىنداعى ارىپتەستەرىمەن سالىستىرعاندا الدەقايدا تومەن. ال جۇمىس مازمۇنى بىردەي جانە ءوزىڭىز بىلەسىزدەر، اسىرەسە، شالعايداعى ەلدى مەكەندەردە جالعىز كىتاپحانا عانا جۇمىس ىستەيدى، ول وقۋشىلاردى عانا ەمەس، بارلىق تۇرعىندى كىتاپپەن قامتاماسىز ەتەدى»، - دەيدى ايماعامبەتوۆ.
ونىڭ سوزىنە قاراعاندا، بۇگىندە ارنايى جۇمىس توبى قۇرىلدى. وعان ءبىلىم جانە عىلىم مينيسترلىگى، ەڭبەك جانە حالىقتى الەۋمەتتىك قورعاۋ مينيسترلىگى، سونداي-اق، قارجى مينيسترلىگىنىڭ ماماندارى كىرەدى.
«ولار جۇمىستى باستاپ كەتتى. ءبىز ءتيىستى ەسەپتى دايىندادىق. بولاشاقتا كوپ كۇتتىرمەي، وسى ماسەلە شەشىلەدى دەپ ۇمىتتەنەمىز»، - دەپ اتاپ كورسەتتى ايماعامبەتوۆ.
ال سەنات توراعاسى ماۋلەن اشىمباەۆ كۇزدە بيۋدجەتتى قاراۋ كەزىندە مەكتەپتەگى كىتاپحاناشىلاردىڭ جالاقىسىن كوتەرۋ ماسەلەسىن ەنگىزۋدى ۇسىندى.
«ءاليحان اسحانۇلى (قارجى ءمينيسترى), ونداي وزەكتى ماسەلە بار. پرەزيدەنتتىڭ تاپسىرماسىنا سايكەس، ۇستازداردىڭ جالاقىسى وتە جاقسى ءوستى. مادەنيەت سالاسىنداعى كىتاپحاناشىلاردىڭ جالاقىسى دا ءوسىپ جاتىر. بىراق مەكتەپتە ىستەيتىن كىتاپحانا قىزمەتكەرلەرى ەڭبەكاقىسىنىڭ وسپەۋى، ارينە، ءبىراز سۇراقتاردى تۋدىرىپ جاتقانى جاسىرىن ەمەس. سوندىقتان كۇزدە الداعى ءۇش جىلدىڭ بيۋدجەتىن قاراعان كەزدە سوعان دەيىن وسى سومانى پىسىقتاپ، قاراپ، سونى ءبارىمىز بىرگە بيۋدجەتكە كىرگىزۋ جاعىن قاراستىرۋىمىز قاجەت»، - دەدى اشىمباەۆ.
"ادىرنا" ۇلتتىق پورتالى
(فوتو Aikyn.kz سايتىنان)
