Mekteptegi qalǵan mamandardyń jalaqysy qashan kóteriledi?

3353
Adyrna.kz Telegram

Senat depýtattary mektep kitaphanalarynda jumys isteıtin qyzmetkerlerdiń jalaqysyn arttyrý máselesin kóterdi, dep habarlaıdy «Adyrna» ulttyq portaly Sputnik Qazaqstan saıtyna silteme jasap.

Búgin senattyń jalpy otyrysynda senator Dınar Nóketaeva mekteptegi kitaphanashylardyń jalaqysyn arttyrý máselesin kóterdi. Onyń aıtýynsha, búginde mádenıet salasyna qaraıtyn, ıaǵnı jalpy halyqqa qyzmet kórsetetin kitaphana qyzmetkerleriniń jalaqysy 30-50 proenti kóterildi. Biraq mekteptegi kitaphanashylardyń eńbekaqysy sol kúıinde qaldy. Al jas urpaqty tárbıeleý men ulttyq qundylyqtardy saqtaý turǵysynda osy mamandardyń atqaratyn róli zor. Osy oraıda depýtat bilim jáne ǵylym mınıstrinen bilim uıymdaryndaǵy kitaphanashylardyń jalaqysy basqa kitaphanashylarmen qashan teńesetinin surady.

Bilim jáne ǵylym mınıstri Ashat Aımaǵambetovtyń aıtýynsha, búginde mektep kitaphanalarynda 13,5 myń adam jumys isteıdi. Olardyń barlyǵy bilim qyzmetkerleri bolyp sanalady. Sol sebepti mádenıet salasyndaǵy kitaphanashylardyń jalaqysyn arttyrý sharalaryna ilikpeı qaldy.

«Bilim salasynda qyzmet etetin 13,5 myń kitaphanashynyń jalaqysy mádenıet salasyndaǵy áriptesterimen salystyrǵanda áldeqaıda tómen. Al jumys mazmuny birdeı jáne ózińiz bilesizder, ásirese, shalǵaıdaǵy eldi mekenderde jalǵyz kitaphana ǵana jumys isteıdi, ol oqýshylardy ǵana emes, barlyq turǵyndy kitappen qamtamasyz etedi», - deıdi Aımaǵambetov.

Onyń sózine qaraǵanda, búginde arnaıy jumys toby quryldy. Oǵan bilim jáne ǵylym mınıstrligi, eńbek jáne halyqty áleýmettik qorǵaý mınıstrligi, sondaı-aq, qarjy mınıstrliginiń mamandary kiredi.

«Olar jumysty bastap ketti. Biz tıisti esepti daıyndadyq. Bolashaqta kóp kúttirmeı, osy másele sheshiledi dep úmittenemiz», - dep atap kórsetti Aımaǵambetov.

Al senat tóraǵasy Máýlen Áshimbaev kúzde bıýdjetti qaraý kezinde mekteptegi kitaphanashylardyń jalaqysyn kóterý máselesin engizýdi usyndy.

«Álıhan Ashanuly (qarjy mınıstri), ondaı ózekti másele bar. Prezıdenttiń tapsyrmasyna sáıkes, ustazdardyń jalaqysy óte jaqsy ósti. Mádenıet salasyndaǵy kitaphanashylardyń jalaqysy da ósip jatyr. Biraq mektepte isteıtin kitaphana qyzmetkerleri eńbekaqysynyń óspeýi, árıne, biraz suraqtardy týdyryp jatqany jasyryn emes. Sondyqtan kúzde aldaǵy úsh jyldyń bıýdjetin qaraǵan kezde soǵan deıin osy somany pysyqtap, qarap, sony bárimiz birge bıýdjetke kirgizý jaǵyn qarastyrýymyz qajet», - dedi Áshimbaev.

"Adyrna" ulttyq portaly

(foto Aikyn.kz saıtynan)

Pikirler