كەشە قازاقستانداعى اقش ەلشىلىگى قازاقستاندىقتاردى لگبت قاۋىمداستىعىن قۇرمەتتەۋگە شاقىرعان بولاتىن. اتاپ ايتقاندا، نۇر-سۇلتان قالاسىنداعى ەلشىلىك عيماراتتىڭ قابىرعاسىنا لگبت-قاۋىمداستىعىنىڭ تۋى ءىلىندى. امەريكالىق ديپلوماتتار تاراتقان اقپاراتتا 17 مامىر – گوموفوبيا، بيفوبيا جانە ترانسفوبياعا قارسى (IDAHOBiT) كۇرەستىڭ جىل سايىنعى حالىقارالىق كۇنى ەكەنى ايتىلعان، دەپ حابارلايدى «ادىرنا» ۇلتتىق پورتالى Azattyq Rýhy سايتىنا سىلتەمە جاساپ.
بۇگىن الماتىدا «نامىس» جاستار قوزعالىسى بۇل باستاماعا قارسىلىق اكتسياسىن وتكىزدى. ولار قالاداعى اقش باس كونسۋلدىعىنىڭ الدىنا كەلىپ، «ءتور قازاقتىكى، اقش ەلشىلىگى ەسىڭدى جي. بۇل ارەكەتىڭ ءۇشىن كەشىرىم سۇراۋىڭ كەرەك. ءبىز قازاقى قۇندىلىقتاردى اياقاستى ەتپەۋدى تالاپ ەتەمىز» دەپ ۇرانداتتى. بەلسەندىلەر جاستار قوزعالىسىنىڭ تۋى مەن قازاقستان رەسپۋبليكاسىنىڭ مەملەكەتتىك تۋىن كوتەرىپ كەلدى.
«اقش دەموكراتيانىڭ جالاۋىن جەلپىپ وتىرعانىمەن، تۇتاس ءبىر ۇلتتىڭ، ەرلەرى مەن باتىرلارى تۋعان قاسيەتتى دالاداعى كوشپەلى حالىقتىڭ، قاراگوز قىزدارى بار، بارلىعىنىڭ مۇددەسىن تاپتاپ وتىر. قوعامداعى از توپتىڭ سويىلىن سوعىپ، ولاردىڭ ءسوزىن سويلەۋ – بارىپ تۇرعان ارانداتۋشىلىق. وتە كەم دۇنيە. ونى وزدەرى ىشتەرىنەن ءبىلىپ، كەلىسىپ بارىپ جاساپ وتىر.
مەن قازاقستان رەسپۋبليكاسىنىڭ ازاماتى رەتىندە ءبىرجىنىستىلاردىڭ ءبىزدىڭ قوعامنىڭ ءبىر بولشەگىنە اينالعانىن قالامايمىن. ويتكەنى ءبىز بولاشاق الدىندا مىندەتىمىز بار: قۇندىلىقتارىمىزدى ساقتاپ، كەلەسى ۇرپاققا جەتكىزۋگە مىندەتتىمىز. سونى ايتىپ اقش كونسۋلدىعىنا كەلدىك. ناقتى تالاپتار لگبت، گەيلەردى ءبىزدىڭ ەلدە ناسيحاتتاۋدى توقتاتۋ جانە ماجبۇرلەمەۋ. سەبەبى ءتور بىزدىكى، قازاق قوناعىن تورگە شىعارعان. بىراق باسىنا شىعارماعان. بىزگە وسىنى قابىلداۋدى ماجبۇرلەپ وتىر. ناقتى ايتساق، كەشەگى ەلشىلىككە ىلگەن تۋ ءۇشىن كەشىرىم سۇراۋىن تالاپ ەتەمىز»، - دەدى «نامىس» جاستار قوزعالىسىنىڭ جەتەكشىسى ازامات جولدانباەۆ.
الماتىداعى اقش باس كونسۋلدىعىنىڭ قىزمەتكەرلەرى قازاق جاستارىنىڭ جازباشا تالابىن قابىلداپ الدى جانە جاقىن كۇندەرى جاۋاپ بەرەتىنىن ايتتى.
ريشات اسقاربەكۇلى
