الماتىدا ءىرى قارجى پيراميداسىنىڭ ۇيىمداستىرۋشىسى ۇستالدى. بۇل تۋرالى الماتى پوليتسيا باسقارماسى باستىعىنىڭ تەرگەۋ جۇمىسى جونىندەگى ورىنباسارى رۋستام ابدراحمانوۆ مالىمدەدى، دەپ جازادى Orda.kz.
1982 جىلى تۋىلعان ازامات ك. قىلمىستىق كودەكستىڭ 217-بابى، 3-بولىگى، 2-تارماعى بويىنشا قىلمىس جاسادى دەپ ايىپتالۋدا. كۇدىكتى ۇستالىپ، قاماۋعا الىندى، – دەدى ول ءوزىنىڭ Facebook پاراقشاسىندا.
رۋستام ابدراحمانوۆ ءبىر توپ ازامات الماتى قالالىق پوليتسيا دەپارتامەنتىنە قارجىلىق پيراميدا قۇرۋ جانە باسقارۋ فاكتىسى بويىنشا «ASTEX.KZ» جشس، «ACD technology» جشس جانە «MUDARABAN Capital» جشس شەنەۋنىكتەرىنە قاتىستى ۇجىمدىق وتىنىشپەن جۇگىنگەنىن ەسكە ءتۇسىردى.
سوتقا دەيىنگى تەرگەۋ بارىسىندا 2019 جىلدىڭ اقپانىنان باستاپ 2021 جىلدىڭ قاڭتارىنا دەيىنگى ارالىقتا اتالعان جشس لاۋازىمدى تۇلعالارى جەكە جانە زاڭدى تۇلعالارمەن مەملەكەتتىك ساتىپ الۋعا قاتىسۋعا تالاپ ەتىلگەن قاراجاتتى تارتۋ ماقساتىندا بىرلەسكەن قىزمەت تۋرالى كەلىسىمشارتتار جاساعانى انىقتالدى. ەكىجاقتى قۇجاتقا سايكەس فيرمالار اي سايىن ءار سالىمشىعا سالىنعان جارنا سوماسىنىڭ 20% تولەپ وتىرۋى كەرەك ەدى، – دەدى ءبولىم باسشىسىنىڭ ورىنباسارى.
سونىمەن قاتار، 160 سالىمشىنىڭ «ASTEX.KZ» جشس-دە شامامەن 1 ملرد تەڭگە كولەمىندەگى قاراجات ونىڭ «MUDARABAN CAPITAL» جشس اگەنتتىك كومپانياسى ارقىلى كەلگەنى انىقتالدى.
پوليتسيا قىزمەتكەرلەرى ول «ASTEX.KZ» جشس مەن «ACD technology» جشس سياقتى باسقا كومپانيالار قۇرىپ، سولار ارقىلى سالىمشىلاردان اقشا تارتقان دەيدى.
ابدراحمانوۆ اتاپ وتكەندەي، 1974 جىلى تۋىلعان ازامات م. قارجى پيراميداسىن قۇردى جانە باسقاردى دەپ كۇدىكتەلۋدە.
ونى ۇستاۋ ءۇشىن جەدەل-تەرگەۋ ءىس-شارالار كەشەنى جۇرگىزىلۋدە. سوت جوعارىدا اتالعان جشس-ءنىڭ زاڭدى مەكەن-جايلارى بويىنشا ىزدەستىرۋ ءىس-شارالارىن جۇرگىزۋ تۋرالى شەشىمدەرگە سانكتسيا بەردى. سوتقا دەيىنگى تەرگەۋ الماتى قالاسى پوليتسيا دەپارتامەنتىنىڭ تەرگەۋ باسقارماسىنىڭ تەرگەۋشىلەرىنە تاپسىرىلدى، – دەپ قوستى ابدراحمانوۆ.
بۇعان دەيىن الماتى پوليتسياسى «ASTEX» ينۆەستيتسيالىق كومپانياسىنىڭ جەتەكشىسى الماز قۇرمانعاليەۆتى ىزدەپ جاتقاندىعى حابارلانعان. كومپانيا تەندەرلەردە اقشانى «اينالدىرۋدى»، ال ونىڭ ورنىنا اي سايىن جوعارى پايىزدار تولەۋدى ۇسىندى.
جابىرلەنۋشىلەر بۇل كومپانيانى پروديۋسەر بايان الاگوزوۆا جارنامالاعاندىقتان، ينۆەستيتسيا سالىپ، ارتىنان الدانىپ قالعانىن ايتتى.
