ءشاۋال ايىندا ورازانى قالاي تۇتۋ كەرەك؟

رامازان ايىنىڭ ورازاسى (30 كۇن) + ءشاۋال ايىنىڭ ورازاسى(6 كۇن) = 1 جىل ورازا

بۇل اللا تاعالانىڭ بىزگە بەرگەن ۇلى مەيىرىمى. از عانا امال جاساپ، ون ەسە ساۋاپ الۋ – جاقسى تابىس كوزى جانە كەرەمەت كەلىسىم.

وسىعان وراي، بىزگە وسى ايداعى ورازانى قالاي ۇستاۋ كەرەك: ءۇزىلىسسىز بە الدە اراسىندا ءۇزىلىس جاساپ پا، رامازانداعى قارىزداردى وتەگەننەن سوڭ با الدە وتەمەس بۇرىن با، قاي كۇندەرى، قاي ۋاقىتتا دەگەن تولاسسىز سۇراقتار كەلىپ تۇسۋدە.

سول سەبەپتى ءبىز ءشاۋال ايىنداعى ورازاعا قاتىستى ءجيى قويىلاتىن سۇراقتارعا جاۋاپ بەرۋدى ۇيعاردىق:

ايەلدەر، ساپارداعىلار مەن رامازان ايىندا سىرقاتتانىپ يا بولماسا بەلگىلى سەبەپتەرمەن ءارى سەبەپسىز ورازاسىن قازا قىلعاندار رامازانداعى قارىز ورازانى كەلەسى رامازانعا دەيىن مىندەتتى تۇردە وتەۋ شارتىمەن  شاۋال ايىندا ورازا تۇتا الادى.

الايدا، ەگەر ءبىرىنشى رامازان ايىنداعى قازانى تولتىرىپ، ارتىنان ءشاۋال ايىنىڭ التى كۇنىن ۇستاۋ ۇنامدى امال بولىپ تابىلادى.

سوعان قاراماستان، ەگەر ادام ۇلگەرمەي جاتسا نەمەسە ءشاۋال ايى اياقتالعانشا التى كۇندى ۇستاي الماي قالامىن دەپ قاۋىپتەنسە، كەرىسىنشە دە جاساۋعا بولادى

ياعني، ءشاۋال ايىنىڭ ەكىنشى جۇلدىزىنان باستاپ رامازان ايىنىڭ قازاسىن وتەپ، ودان ءارى ءشاۋال ايىنىڭ ءناپىل ورازاسىن ۇستاۋعا بولادى.

الايدا، ولار ءبىر جىلدىق ورازا تۇتقاننىڭ ساۋابىن الا المايدى. سەبەبى ونداي ساۋاپتى الۋ ءۇشىن، حاديستە كەلگەندەي، پارىز بولعان ورازانى مىندەتتى تۇردە ۇستاۋى قاجەت.  سوعان قاراماستان، اللا قالاسا، ولار ءشاۋال ايىنداعى التى كۇندىك ورازانىڭ ساۋابىن الادى.

دەگەنمەن، ولار ءۇشىن رامازانداعى قازانىڭ ورنىن تولىقتىرۋ حايىرلى. سەبەبى پارىزدى قالدىرىپ قويۋ اللانىڭ الدىندا ۇلكەن كۇنا بولىپ سانالادى.

ەگەر رامازان ايىندا ەشقانداي قازاسى بولماعان جاندار بولسا، ءشاۋال ايىنىڭ ورازاسىن دۇيسەنبى جانە بەيسەنبى كۇندەرى ۇستالاتىن سۇننەت ورازاسى كۇندەرى اۋىز بەكىتۋىنە بولادى. الايدا، بۇل ءبىر جولى عانا. ءشاۋال ايىنىڭ قوسىمشا ورازاسىن قاي كۇنى ۇستاۋ ءار ادامنىڭ جەكە باسىنىڭ ءىسى.

تاڭ نامازى مەن اقشام نامازىنىڭ ۋاقىتتارى قاي كەزدە كىرەتىنىن ءبىلۋ ءۇشىن سايتىمىزداعى "ناماز ۋاقىتتارى" ايدارىنا كىرىپ، ءوز قالاڭىزدى تاڭداپ، سول جەردەن انىقتاي الاسىز.

تاڭ نامازى – اۋىز بەكىتەر ۋاقىتتىڭ باستالۋى. بۇل دەگەن ءسوز، سارەسى ءىشۋدى جانە ورازانى بۇزاتىن امالداردى (ەرلى- زايىپتىلارعا جىنىستىق قاتىناستى، ءتىس تازالاۋ بارىسىندا ءتىس پاستاسى جۇتىپ قويۋ، تاعى باسقا ) توقتاتۋ قاجەت دەگەن ءسوز. رامازان ايىنداعى ورازانى بۇزاتىن امالدىردىڭ بارلىعى دا كەز كەلگەن ورازانى دا بۇزادى.اقشام نامازىنىڭ ۋاقىتى – اۋىز اشاتىن ۋاقىت. كۇن ۇياسىنا باتا سالىسىمەن مۇسىلمان ادام ورازادا تىيىم سالىنعان امالداردى جاساۋىنا بولادى.