فوتو: Sagarmatha Pollution Control Committee (SPCC)
ەۆەرەستتە جوعالىپ كەتىپ، قازا تاپتى دەپ ەسەپتەلگەن نەپالدىق تاجىريبەلى الپينيست داۆا شەرپا التى كۇننەن كەيىن ءتىرى تابىلدى. ول بازالىق لاگەرگە دەيىن ءوز كۇشىمەن جەتكەن. بۇل تۋرالى ۆۆس جازدى، دەپ حابارلايدى "ادىرنا".
52 جاستاعى الپينيست 30 مامىر كۇنى ەۆەرەست شىڭىنان ءتۇسۋ كەزىندە جوعالىپ كەتكەن بولاتىن. داۆا شەرپا الپينيزم سالاسىنداعى مول تاجىريبەسى ءۇشىن «حيللاري» دەگەن لاقاپ اتپەن تانىمال.
ونى 5 ماۋسىم كۇنى تاڭەرتەڭ ەۆەرەستتە مارشرۋتتاردى دايىنداپ، قورشاعان ورتانى تازالاۋمەن اينالىساتىن Sagarmatha Pollution Control Committee (SPCC) ۇيىمىنىڭ قىزمەتكەرلەرى بازالىق لاگەر ماڭىنان تاپقان. قۇتقارۋشىلاردىڭ ايتۋىنشا، شەرپا تومەن قاراي ەڭبەكتەپ كەلە جاتقان.
وقيعا كوكتەمگى الپينيستىك ماۋسىمنىڭ سوڭعى كۇندەرىندە بولعان. داۆا شەرپا ەكى شەتەلدىك ءالپينيستى ەۆەرەست شىڭىنا باستاپ شىققان. الايدا اۋا رايى مەن مارشرۋتتىڭ كۇردەلى بولۋىنا بايلانىستى كوتەرىلۋ جوسپارلانعان ۋاقىتتان الدەقايدا ۇزاققا سوزىلعان.
شىڭنان ءتۇسۋ كەزىندە داۆا شەرپا شامامەن 7500 مەتر بيىكتىكتە توقتاپ دەمالعان. ودان كەيىن ونى ەشكىم كورمەگەن. بىرنەشە كۇن بويى ىزدەستىرۋ-قۇتقارۋ جۇمىستارى جۇرگىزىلگەنىمەن، ناتيجە بولماعان.
كەيىن بەلگىلى بولعانداي، ول التى كۇن بويى جالعىز ءوزى تومەن ءتۇسىپ جۇرگەن. ونىڭ جانىندا ازىق-تۇلىك تە، قوسىمشا وتتەگى دە بولماعان. سونىمەن قاتار ماۋسىم اياقتالعاندىقتان، حۋمبۋ مۇزدىعىنداعى كەيبىر وتكەلدەر مەن ساتىلار الىنىپ تاستالعان ەدى. سوعان قاراماستان، ول قاۋىپتى ۋچاسكەلەردەن ءوز بەتىنشە ءوتىپ، بازالىق لاگەرگە جاقىنداي العان.
داۆا شەرپا ىزدەۋ جۇرگىزگەن تىكۇشاقتى كورىپ، بەلگى بەرگەنىمەن، قۇتقارۋشىلار ونى بايقاماعان. سەبەبى ىزدەۋ جۇمىستارى ونىڭ ورنالاسۋى مۇمكىن دەگەن جوعارى ايماقتاردا جۇرگىزىلگەن.
تابىلعان كەزدە شەرپانىڭ ساۋساقتارى قاتتى ءۇسىپ قالعان، سويلەۋى دە قيىن بولعان. ول الدىمەن بازالىق لاگەرگە جەتكىزىلىپ، كەيىن تىكۇشاقپەن كاتماندۋداعى اۋرۋحاناعا ەۆاكۋاتسيالاندى. دارىگەرلەر ونىڭ جاعدايى تۇراقتى ەكەنىن حابارلادى.
ايتا كەتەيىك، 2026 جىلعى كوكتەمگى ماۋسىم ەۆەرەست تاريحىنداعى ەڭ قارقىندى ماۋسىمداردىڭ ءبىرى بولدى. بەيرەسمي مالىمەتتەر بويىنشا، بيىل الەمنىڭ ەڭ بيىك شىڭىنا مىڭنان استام كوتەرىلۋ تىركەلگەن.
