وتاندى قورعاۋ، ءسۇيۋ – وتباسىنان باستالادى جانە ءاربىر ازاماتتىڭ قاسيەتتى پارىزى. قازىرگى تاڭدا اسكەري قىزمەتتى مىندەتى دەپ بىلەتىن، وتانىن قورعاۋدى ارماندايتىن جاستاردىڭ قاتارى از ەمەس. بىراقتا، وسى جولدا باتىل قادام جاساپ، ارمانى جولىندا قيىنشىلىقتاردان قايمىقپاعاندار عانا ناعىز ەل قورعانى بولىپ ءجۇر.
اسكەري ءومىردى ەر بالاعا ءتۇسىندىرىپ، وسى مىندەتكە باۋلىپ، قايراپ وسىرۋدە اكەنىڭ ورنى ەرەكشە. حالقىمىزدىڭ «اكە – اسقار تاۋ» دەپ ايتۋى دا سول اكەنىڭ وتباسىنداعى ورنى مەن قۇرمەتىنە وراي بولسا كەرەك. اكە ءىسىن جالعاستىرىپ، ايتقاندارىن قۇرمەتتەپ ورىنداۋ بالا ءۇشىن پارىز. اكە ارمانىن اسقاقتاتىپ، ورىنداي الماعان ىستەرىن جالعاستىرۋشى ازاماتتار رەتىندە ەگىز لەيتەنانت امان مەن ەسەن بيسەمبايلار تۋرالى ايتۋعا بولادى.
امان مەن ەسەن اقتوبە قالاسىندا جۇمىسشىلار وتباسىندا دۇنيەگە كەلگەن. انالارى ەسەپشى ماماندىعى بويىنشا جۇمىس جاساپ كەلەدى. اكەلەرى سابىرجان ءوز ۋاقىتىندا تالعات بيگەلدينوۆ اتىنداعى اۋە قورعانىس كۇشتەرىنىڭ اسكەري ينستيتۋتىنا وقۋعا تۇسۋگە باعىن سىناپ، بەلگىلى سەبەپتەرمەن تۇسە الماعان. اسكەري ۇشقىش بولۋدى باستى ماقسات ەتكەن سابىرجان 2012 جىلى سىرقاتتانىپ دۇنيەدەن ءوتتى. اكە ارمانىن جۇزەگە اسىرۋعا بەل بۋعان ەگىزدەر مەكتەپ قابىرعاسىن تامامداعان سوڭ كەڭەس وداعىنىڭ ەكى مارتە باتىرى تالعات بيگەلدينوۆ اتىنداعى اۋە قورعانىس كۇشتەرىنىڭ اسكەري ينستيتۋتىنا وقۋعا تۇسۋگە شەشىم قابىلدايدى.
اتالعان ينستيتۋتقا ءتۇسۋ ەرەجەلەرىنە ساي تەكسەرىستەردەن، وقۋ پاندەرى مەن دەنە شىنىقتىرۋ دايىندىعى سىناقتارىنان جاقسى ناتيجە كورسەتكەن ەگىزدەر 2017 جىلى اقتوبە قالاسىنداعى اتالعان اسكەري ينستيتۋتىنا وقۋعا قابىلدانادى. بالا كەزدەن سپورتقا اۋەس امان مەن ەسەن اسكەري ءومىردىڭ العاشقى باسپالداعى بولىپ سانالاتىن ينستيتۋت قابىرعاسىندا كومانديرلەر مەن سەرجانتتاردىڭ تاپسىرمالارىن جوعارى ناتيجەدە ورىنداپ، بىرنەشە رەت باسشىلىق تاراپىنان العىستارعا يە بولدى. سپورتتىڭ فۋتبول ءتۇرىن جاندارىنا سەرىك ەتكەن ولار بىرنەشە سايىستاردا توپ جاردى.
2021 جىلى جوعارى وقۋ ورنىن ءبىتىرىپ، «لەيتەنانت» شەنىن العان جاس ۇشقىش اقتاۋ گارنيزونىنداعى 30153 اسكەري بولىمىندە قىزمەتتەرىن جالعاستىرۋدا.
لەيتەنانت امان بيسەمباي وسى بولىمدە تەحنيكالىق پايدالانۋ ءبولىمىنىڭ ۇشاقتى رەگلامەنتتەۋ جانە جوندەۋ توبىنىڭ اۆياتسيالىق اعا تەحنيگى بولسا، ال لەيتەنانت ەسەن بيسەمباي تەحنيكالىق پايدالانۋ ءبولىمىنىڭ اۆياتسيالىق قوزعالتقىشتاردى رەگلامەنتتەۋ جانە جوندەۋ توبىنىڭ اۆياتسيالىق اعا تەحنيگى.
انتىنا ادال، سەرتىنە بەرىك، اكە ارمانىن ورىنداي بىلگەن امان مەن ەسەن ەلىمىزدەگى بولاشاق وتان قورعاۋشى جاستارىمىزعا ۇلگى بولارى انىق.
مۇحيت قوناروۆ
قىزىلوردا گارنيزونى ءباسپاسوز قىزمەتىنىڭ باستىعى، لەيتەنانت
