رەسەيدىڭ ەكىنشى شىعىس وكرۋگتىك اسكەري سوتى التاي بەلسەندىسى ارۋنا ارناعا تەرروريزمگە شاقىرۋ ءىسى بويىنشا بەس جىلعا باس بوستاندىعىنان ايىرۋ جازاسىن تاعايىندادى. بۇل تۋرالى «مەديازونا» جازدى، دەپ حابارلايدى «ادىرنا» ءتىلشىسى.
ارۋنا ارنا بىلتىر التايدا مۋنيتسيپالدىق رەفورماعا قارسى اكتسيالار ۇيىمداستىرعان. سونىمەن قاتار ايماق گۋبەرناتورى اندرەي تۋرچاكتىڭ وتستاۆكاعا كەتۋىن تالاپ ەتكەن. ول وتكەن جىلدىڭ قىركۇيەگىندە ۇستالعان.
«گولوس التايا» ارناسىنىڭ مالىمەتىنشە، ءىس قوزعاۋعا ونىڭ تەلەگرام-ارناسىندا «ۆارشاۆيانكا» جانە «ينتەرناتسيونال» سىندى رەۆوليۋتسيالىق اندەردىڭ جاريالانۋى سەبەپ بولعان. بۇل اندەرگە تىيىم سالىنباعانىمەن، بيلىك ولاردى «تەرروريزمگە شاقىرۋ» دەپ باعالاعان.
2026 جىلدىڭ ساۋىرىندە جاريالانعان ۇندەۋىندە ارنا «تاريحي ماڭىزى بار، بەلگىلى ءبىر ساياسي كوزقاراستاردى بىلدىرەتىن شىعارمالاردى ورىنداۋ قۇقىقبۇزۋشىلىق بولىپ سانالمايدى» دەپ اتاپ وتكەن.
«ينتەرناتسيونال» جانە «ۆارشاۆيانكا» ماتىندەرىندە پرەزيدەنت ۆلاديمير ءپۋتيندى، قازىرگى رەسەيدى، دەپۋتاتتاردى نەمەسە كۇشتىك قۇرىلىمداردى تىكەلەي اتاپ ءوتۋ جوق. بىراق وسى اندەر ءۇشىن قاماۋدا وتىرمىن جانە اسكەري سوت مەنى تەرروريست رەتىندە سوتتاپ جاتىر. بۇل ءدال قازىر كونستيتۋتسيا بويىنشا قۇقىقتىق ءارى دەموكراتيالىق مەملەكەت بولۋى ءتيىس ەلدە بولىپ جاتىر»، – دەدى ول.
ارنا ءوزىن «التايدىڭ حالىقتىق كوشباسشىسى» دەپ اتايدى. ول – رەسەي بيلىگىن سىنايتىن قوعام بەلسەندىسى ءارى كونسپيرولوگ سۆەتلانا لادا-ءرۋستىڭ (پەۋنوۆا) جاقتاۋشىسى. ونىڭ ۇيىمداستىرعان نارازىلىق اكتسيالارىنا جۇزدەگەن ادام قاتىسقان. بۇعان دەيىن SOTAvision باسىلىمى ارۋنا ارنانى بيلىككە قارسى مىڭداعان قول جيناپ، اندرەي تۋرچاكتىڭ وتستاۆكاسىن تالاپ ەتەتىن قۇجاتتاردى ماسكەۋگە اپارۋ ءۇشىن ۇشپاق بولعان كۇنى ۇستاعانىن جازعان.
ەسكە سالايىق، بىلتىر التايلىق بەلسەندىنىڭ تەرروريستەر تىزىمىنە ەنگەنىن جازعان ەدىك.
