جاپونيادا "ۋتيلسبور" قالاي ىسكە اسادى؟
قاراڭىز قالاي ىسكە اساتىنىن...
جاپونيادا ۋتيلسبورعا قولىڭىزعا ارنايى سەرتيفيكات بەرەدى. ولاردا ارنايى ساقتاندىرۋ كومپانيالارى جۇمىس جاساعانىمەن، ۋتيلسبورعا، مەملەكەتتىك تىركەۋ مەن الىمدارعا قاتىستى بارلىق قاراجات ەلىنىڭ ۇلتتىق بيۋدجەتىنە تۇسەدى. جاپونيادا بىزدەگى سياقتى الاياق ديستريبيۋتورلار مەن ۇرلىق جاسايتىن جشس-عا ەشقاشان دا جول بەرىلمەيدى. ول - جاپونيا، ال ءبىز - قازاقستان.
جاپونيادا كولىگىڭىزگە پاركوۆكاعا دا ارنالعان انىقتاما قاعازى بەرىلەدى. بۇل قاعاز الدىمەن سىزدە بولۋى كەرەك، وسى انىقتاماسىز ءسىز ەش جەردەن كولىك ساتىپ الا المايسىز.
كولىگىڭىزگە تەحنيكالىق بايقاۋ بويىنشا دا سەرتيفيكات بەرىلەدى. بۇل مىندەتتى قۇجات ەكى نەمەسە ءۇش جىلعا بەرىلەدى.
ال، نەگىزگى قۇجاتقا كەلەيىك. بۇل ۋتيلسبورعا قاتىستى قۇجات. مىسالى مىناۋ سۋرەتتەگى MAZDA CX-8 كولىگىنە مەملەكەت تاراپىنان ۇستالاتىن قاراجات كولەمى 120 دوللارمەن عانا شەكتەلەدى. بۇل جاپونيا بويىنشا ۋتيلسبورعا تولەنەتىن ەڭ جوعارى قاراجات بولىپ تابىلادى. بۇدان ارتىق ەشتەڭە دە تولەنبەيدى.
ال ەندى سالىستىرمالى تۇردەگى بىزدەگى تولەمدەردى جاپونياداعى نەمەسە اقش-تاعى تولەمدەرمەن ولشەپ، ەسەپتەپ، قورىتىندىسىن جازايىق. الدىڭعى پوستتا مەن اقش-تان كەلگەن Toyota Camry V50-ءدىڭ 3,9 ميلليون تۇراتىنىن ايتىپ ەدىم. بۇل باعا جاپونيادا دا سول شامالاس، ياعني 3,7-3,9 ميلليون تۇرادى. ال، ءبىزدىڭ ەلگە كەلگەندە ونىڭ باعاسى 9 ميلليونعا شىعادى. ءبىز Toyota Camry V50-عا ۋتيلسبور ءۇشىن مەملەكەتتىڭ بيۋدجەتىنە ەمەس، جەكە دەلدالدارعا 4 132 000 تەڭگەنى قولىنا وپ-وڭاي ۇستاتا سالادى ەكەنبىز.
ەسەپتەيىك:
جاپونيادا ۋتيلسبور 120 دوللار، قازىرگى باعاممەن;
120ح420=50400
ياعني جاپونيادا ۋتيلسبورعا ءبىزدىڭ تەڭگەمەن 50400 تەڭگە عانا تولەيسىز. بۇل ولارداعى ەڭ جوعارى باعا.
ال، بىزگە كەلەيىك:
بىزدە ۋتيلسبورى بار، العاشقى تىركەۋى بار، ندس-ءى بار، باسقا دا ۇستالىپ قالاتىن (ادەتتە مەملەكەتتىك دەپ اتالاتىن ءبىر اتاۋى دا قوسارلانا ايتىلادى) الىمدارى بار. بارلىعى 4 132 000 تەڭگە بولادى. سوندا ۋتيلسبور الىمىنان ساتىپ الىپ كەلگەن كولىگىڭىزدەن دە اسىپ كەتكەن باعانى كورەسىز.
ال ەندى جاپونيادان بىزدىكى قانشا ەسە جوعارى ەكەنىن ماتەماتيكالىق جولمەن ەسەپتەپ شىعارايىن.
4 132 000 : 50400 = 82
سوندا ءسىز جاپونيامەن سالىستىرعاندا 82 ەسە كوپ قاراجاتتى دەلدال كومپانيالارعا تاپسىراسىز، ياعني تولەيسىز. ول بيۋدجەتكە تۇسسە مەيلى عوي، جەكە جەكە قالتالارعا كەتەدى.
بەكبولات قارجان،
"ادىرنا" ۇلتتىق پورتالى
