ايتىسكەر، اقىن بالعىنبەك يماشەۆ Instagram جەلىسىندەگى پاراقشاسىندا مەملەكەت باسشىسىنا ۇندەۋ جاسادى، دەپ حابارلايدى «ادىرنا» ۇلتتىق پورتالى.
«قۇددىس قالاسى يسلام ءدىنىن ۇستاناتىن مۇسىلماندار ءۇشىن مەككە مەن مەدينەدەن كەيىنگى ءۇشىنشى قاسيەتتى مەكەن. وسى شاھارداعى ءال-اقسا مەشىتىنەن پايعامبارىمىز ميعراجعا كوتەرىلگەن. نەشە كۇننەن بەرى يزرايل اسكەرى پالەستيناداعى مۇسىلماندارعا قارۋ قولدانىپ، تاراۋىق نامازدارىن وقىتپاي، قيانات جاساۋدا. بۇكىل مۇسىلمان مەملەكەتتەرى ءۇنسىز. جالعىز تۇركيا پرەزيدەنتى (ونى اللا پاناسىنا السىن) تايىپ رەجەپ ەردوعان عانا شىرىلداپ، باۋىرلارعا قورعان بولۋعا شاقىرىپ، بارشا مۇسىلماندارعا ۇندەۋ تاستاۋدا. رامزان قادىروۆ تا قالىس قالماي، قۇددىستاعى مۇسىلمانداردى قولدايتىنىن ءبىلدىردى. ۋا، قازاقيا مۇسىلماندارى! رامازاننىڭ سوڭعى كۇندەرى قاتتى دۇعادا بولايىق! اللانىڭ دۇشپاندارىنا اللانىڭ قاھارى جاۋسىن! لاعنەتى جاۋسىن! يا، راببىم، قۇددىس ولكەسىندەگى قۇلدارىڭدى ءوزىڭ قورعا! ءبىزدىڭ قازاقستان رەسپۋبليكاسى زايىرلى بولعانىمەن 70% دان ارتىق مۇسىلماندار تۇراتىن مەملەكەت ەمەس پە؟
قۇرمەتتى، قاسىمجومارت كەمەلۇلى! ءسىز الەمدەگى بەدەلدى ديپلوماتتاردىڭ ءبىرىسىز! ەڭ بولماعاندا سىرتقى ىستەر مينيسترلىگىنىڭ قارسىلىق نوتاسىن جولداپ، پالەستيناداعى باۋىرلارىمىز ءۇشىن اراشا سۇراۋعا نە كەدەرگى؟ يا، ءبىز سانى از، قۋاتى ءالسىز ەل شىعارمىز. بىراق، ءبىزدىڭ اتومنان باس تارتقان بەيبىتشىلىك سۇيگىش ەل رەتىندە ءوز ۇستانىمىمىزدى ايتۋعا قۇقىعىمىز بار شىعار؟» - دەپ جازدى ول.
"ادىرنا" ۇلتتىق پورتالى
