Aıtysker, aqyn Balǵynbek Imashev Instagram jelisindegi paraqshasynda memleket basshysyna úndeý jasady, dep habarlaıdy «Adyrna» ulttyq portaly.
«Quddys qalasy Islam dinin ustanatyn musylmandar úshin Mekke men Medıneden keıingi úshinshi qasıetti meken. Osy shahardaǵy Ál-Aqsa meshitinen Paıǵambarymyz Mıǵrajǵa kóterilgen. Neshe kúnnen beri Izraıl áskeri Palestınadaǵy musylmandarǵa qarý qoldanyp, taraýyq namazdaryn oqytpaı, qııanat jasaýda. Búkil Musylman memleketteri únsiz. Jalǵyz Túrkııa Prezıdenti (ony Alla panasyna alsyn) Taıyp Rejep Erdoǵan ǵana shyryldap, baýyrlarǵa qorǵan bolýǵa shaqyryp, barsha musylmandarǵa úndeý tastaýda. Ramzan Qadyrov ta qalys qalmaı, Quddystaǵy musylmandardy qoldaıtynyn bildirdi. Ýa, Qazaqııa musylmandary! Ramazannyń sońǵy kúnderi qatty duǵada bolaıyq! Allanyń dushpandaryna Allanyń qahary jaýsyn! Laǵneti jaýsyn! Iıa, Rabbym, Quddys ólkesindegi quldaryńdy óziń qorǵa! Bizdiń Qazaqstan Respýblıkasy zaıyrly bolǵanymen 70% dan artyq musylmandar turatyn memleket emes pe?
Qurmetti, Qasymjomart Kemeluly! Siz álemdegi bedeldi dıplomattardyń birisiz! Eń bolmaǵanda Syrtqy ister mınıstrliginiń Qarsylyq Notasyn joldap, Palestınadaǵy baýyrlarymyz úshin arasha suraýǵa ne kedergi? Iıa, biz sany az, qýaty álsiz el shyǵarmyz. Biraq, bizdiń Atomnan bas tartqan beıbitshilik súıgish el retinde óz ustanymymyzdy aıtýǵa quqyǵymyz bar shyǵar?» - dep jazdy ol.
"Adyrna" ulttyq portaly
