ءا. قاستەەۆ اتىنداعى قازاقستان رەسپۋبليكاسىنىڭ ۇلتتىق ونەر مۋزەيىندە جاڭعىرتىلعان «ارت-زەرتحانا» مۋزەيلىك كوركەمسۋرەت ستۋدياسى تانىستىرىلدى. مۇندا جىل سايىن 3 مىڭعا جۋىق بالا مەن ەرەسەك شىعارماشىلىقپەن اينالىسا الادى.
ءىس-شاراعا قر پرەمەر-ءمينيسترىنىڭ ورىنباسارى – مادەنيەت جانە اقپارات ءمينيسترى ايدا بالاەۆا، «سامۇرىق-قازىنا» اق باسقارما توراعاسى نۇرلان جاقىپوۆ، ءا. قاستەەۆ اتىنداعى قر ۇلتتىق ونەر مۋزەيىنىڭ ديرەكتورى گۇلايىم جۇمابەكوۆا، ەلىمىزدىڭ مادەنيەت جانە ونەر قايراتكەرلەرى، شەبەرلەر مەن مۋزەيلىك كوركەمسۋرەت ستۋدياسىنىڭ شاكىرتتەرى قاتىستى.
«ارت-زەرتحانا» – مۋزەي پەداگوگيكاسى اياسىندا 2007 جىلدان بەرى جۇزەگە اسىرىلىپ كەلە جاتقان ۇلتتىق ونەر مۋزەيىنىڭ شىعارماشىلىق-ءبىلىم بەرۋ جوباسى. ونىڭ باستى ماقساتى – بالالاردىڭ، جاسوسپىرىمدەردىڭ، جاستار مەن ەرەسەكتەردىڭ بەينەلەۋ ونەرىنە قىزىعۋشىلىعىن ارتتىرىپ، شىعارماشىلىق الەۋەتىن اشۋ.
كاسىبي سۋرەتشى-پەداگوگتەردىڭ جەتەكشىلىگىمەن اكادەميالىق سۋرەت، كەسكىندەمە، كومپوزيتسيا، گرافيكا، ساندىك-قولدانبالى ونەر جانە شىعارماشىلىق ىزدەنىستىڭ ءتۇرلى باعىتتارى بويىنشا ساباقتار وتكىزىلەدى. جوبا جۇزەگە اسىرىلعان ۋاقىتتان بەرى ستۋديادا 10 مىڭنان استام بالا مەن ءجاسوسپىرىم ءبىلىم الدى.
سونىمەن قاتار ستۋديا ەرەكشە ءبىلىم بەرۋ قاجەتتىلىكتەرى بار بالالارعا ارنالعان شىعارماشىلىق باعدارلامالاردى جۇيەلى تۇردە جۇزەگە اسىرىپ، ينكليۋزيۆتى مۋزەيلىك ءبىلىم بەرۋ قاعيداتتارىن دامىتۋعا ۇلەس قوسىپ كەلەدى.
جاڭعىرتىلعان جوبانىڭ تانىستىرىلىمىندا ايدا بالاەۆا ونەردى دامىتۋعا مەملەكەتتىك قولداۋ كورسەتۋ، جاستاردى شىعارماشىلىققا باۋلۋ جانە ولاردىڭ قابىلەتىن اشۋعا قولايلى جاعداي جاساۋ مادەنيەت ساياساتىنىڭ ماڭىزدى باسىمدىقتارىنىڭ ءبىرى ەكەنىن اتاپ ءوتتى.
«مەملەكەت باسشىسى مادەنيەت سالاسىنا ايرىقشا كوڭىل ءبولىپ كەلەدى. سالانى قولداۋعا باعىتتالعان جۇيەلى مەملەكەتتىك ساياساتتىڭ ارقاسىندا بۇگىندە ناقتى ناتيجەلەرگە قول جەتكىزدىك. 2025 جىلى قازاقستان رەسپۋبليكاسىنىڭ ورتالىق مەملەكەتتىك مۋزەيى مەن ءابىلحان قاستەەۆ اتىنداعى مەملەكەتتىك ونەر مۋزەيىنە، ال 2026 جىلى ۇلتتىق مۋزەيگە «ۇلتتىق» مارتەبەسى بەرىلدى. سونىمەن قاتار پرەزيدەنتتىڭ تاپسىرماسى بويىنشا بىلتىر «سامۇرىق-قازىنا» قورى قاستەەۆ مۋزەيىندە اۋقىمدى جوندەۋ جۇمىستارىن جۇرگىزدى. «قازاقستاننىڭ ەڭبەك سىڭىرگەن سۋرەتشىسى» قۇرمەتتى اتاعىنىڭ تاعايىندالۋى دا ماڭىزدى شەشىمنىڭ ءبىرى بولدى. بۇل وتاندىق بەينەلەۋ ونەرىنىڭ قوعامداعى ورنىنا بەرىلگەن جوعارى باعا ءارى ءوز ىسىنە ادالدىقپەن قىزمەت ەتىپ كەلە جاتقان سۋرەتشىلەردىڭ كوپجىلدىق ەڭبەگىنە كورسەتىلگەن لايىقتى قۇرمەت. وسى مۇمكىندىكتى پايدالانا وتىرىپ، مادەنيەت سالاسىنىڭ بارشا وكىلدەرىنىڭ جانە جەكە ءوزىمنىڭ اتىمنان مەملەكەت باسشىسىنا سالاعا كورسەتىپ كەلە جاتقان تۇراقتى قولداۋى ءۇشىن شىنايى ريزاشىلىعىمدى بىلدىرەمىن»، – دەدى پرەمەر-ءمينيستردىڭ ورىنباسارى.
«سامۇرىق-قازىنا» قورىنىڭ قولداۋىمەن جۇزەگە اسىرىلعان جوبا اياسىندا مۋزەيدىڭ شىعارماشىلىق كەڭىستىگى جاڭعىرتىلدى. اۋماعى 110 شارشى مەتردەن اساتىن زەرتحانا كەسكىندەمە، گرافيكا جانە ساندىك-قولدانبالى ونەر ساباقتارىن وتكىزۋگە ارنالعان زاماناۋي قۇرال-جابدىقتارمەن قامتاماسىز ەتىلدى. سونىمەن قاتار ستۋديادا شىعارماشىلىق جۇمىستاردى تانىستىرۋعا ارنالعان، زاماناۋي فوتواپپاراتۋرامەن جابدىقتالعان ارنايى فوتوكەڭىستىك قۇرىلدى. بۇل شاكىرتتەرگە ءوز تۋىندىلارىن كاسىبي دەڭگەيدە تانىستىرىپ، شىعارماشىلىق جەتىستىكتەرىن تسيفرلىق كەڭىستىكتە كەڭىنەن كورسەتۋگە مۇمكىندىك بەرەدى. مۇندا 5 پەن 17 جاس ارالىعىنداعى بالالار مەن جاسوسپىرىمدەرگە ارنالعان شەبەرلىك ساباقتارى، شىعارماشىلىق پراكتيكۋمدار جانە تابيعات اياسىنداعى سۋرەت سالۋ ساباقتارى وتكىزىلەدى.
«ارت-زەرتحانا» جاس دارىندار باس قوساتىن شىعارماشىلىق ورتاعا اينالىپ، ولاردىڭ دامۋىنا جانە تىڭ ىزدەنىستەرىنە جاڭا مۇمكىندىكتەر بەرەدى دەپ سەنەمىن. «سامۇرىق-قازىنا» ءۇشىن مادەنيەتتى قولداۋ – ۇلتتىق مۇرامىزدى ساقتاۋعا جانە زاماناۋي مادەني ورتانى دامىتۋعا قوسىلعان ۇلەس»، – دەدى نۇرلان جاقىپوۆ.
ايتا كەتەيىك، ستۋديا شىعارماشىلىق قابىلەتى جوعارى بالالار مەن جاستاردى قولداۋعا، ولاردىڭ بولاشاق ماماندىعىن دۇرىس تاڭداۋىنا ەرەكشە كوڭىل بولەدى. دارىندى شاكىرتتەردى جوعارى جانە ورتا ارناۋلى كوركەمونەر وقۋ ورىندارىنا تۇسۋگە دايارلاپ، شىعارماشىلىق الەۋەتىنىڭ دامۋىنا جانە بولاشاق سۋرەتشى رەتىندە قالىپتاسۋىنا ىقپال ەتەدى.
ءىس-شارا اياسىندا قوناقتارعا مۋزەيدىڭ تسيفرلىق پورتالى دا تانىستىرىلدى. جاڭعىرتىلعان پورتالدىڭ قولدانىسى بارىنشا ىڭعايلى ءارى ينكليۋزيۆتى بولا ءتۇستى. ەندى كەلۋشىلەر مۋزەي كوللەكتسياسى مەن كورمەلەرىن ونلاين تاماشالاي الادى. ال 3D-تۋر كەز كەلگەن جەردەن مۋزەي كەڭىستىگىنە ۆيرتۋالدى ساياحات جاساپ، ەكسپوزيتسيالارمەن تانىسۋعا مۇمكىندىك بەرەدى.
