شىمكەنت قالاسىنداعى ونكولوگيالىق ورتالىقتىڭ مەديتسينا ماماندارى قوسالقى اۋرۋى بار قاتەرلى ىسىككە شالدىققان ناۋقاستارعا كۇردەلى وتا جاساۋ تەحنيكاسىن مەڭگەرۋدە.
قازاق ونكولوگيا جانە راديولوگيا عىلىمي-زەرتتەۋ ينستيتۋتىنىڭ ونكوگينەكولوگيا ورتالىعىنىڭ جەتەكشىسى ەرلان كۋكۋباسوۆ جانە ونكوگينەكولوگيا ورتالىعىنىڭ دارىگەرى ورىنباسار بەرتىلەۋوۆ 22 ساۋىردەن بەرى شىمكەنتتىك ونكولوگتار ءۇشىن شەبەرلىك ساباعىن وتكىزىپ جاتىر. ولار جەرگىلىكتى دارىگەرلەرگە جاڭا اپپاراتتا كۇردەلى وپەراتسيا جاساۋ كەزەڭىن جانە تەحنيكانى قولدانۋ ءادىسىن ءىس جۇزىندە جاساپ كورسەتۋ ۇستىندە.
تاجىريبە بارىسىندا الماتىدان كەلگەن دارىگەرلەر قوسالقى اۋرۋلارى بار وبىر اۋرۋىنا شالدىققان ناۋقاستارعا لاپاروسكوپيالىق ادىسپەن وتا جاسادى. وپەراتسيا جاسالعان ناۋقاستاردىڭ باسىم بولىگىندە سەمىزدىككە شالدىققان جانە قانت ديابەتى، ارتەريالدى گيپەرتەنزيا سىندى قوسالقى اۋرۋلارى بار.
لاپاروسكوپيالىق ادىستە ناۋقاستىڭ اعزاسىن كەسپەي وتا جاسايدى. مامانداردىڭ ايتۋىنشا، بۇل ناۋقاستىڭ تەز ايىعۋىنا، تەرىسىندە ءىز قالدىرماۋعا مۇمكىندىك بەرەدى. ءتىپتى ناۋقاس وپەراتسيا جاساعان كۇنى كەشكىسىن وزدەگىنەن تۇرىپ جۇرە الادى دەيدى.
شىمكەنت قالاسى اكىمدىگىنىڭ ءباسپاسوز قىزمەتى
➖➖➖➖➖➖➖➖➖➖➖➖➖➖➖➖
