مۇرات ايتەنوۆ: بۇقارالىق سپورتتى دامىتۋدا - جاستار ليگاسىنىڭ ماڭىزى زور

2992
Adyrna.kz Telegram

قالالىق ءبىلىم باسقارماسىنىڭ باسشىسى «شىمكەنت جاستار ليگاسى» جارىسىنىڭ ءوتىلۋ بارىسى جونىندە باياندادى.

مەملەكەت باسشىسىنىڭ تاپسىرماسىنا سايكەس جاستاردىڭ بوس ۋاقىتىن ءتيىمدى پايدالانۋ، سالاۋاتتى ءومىر سالتىن ناسيحاتتاۋ، بۇقارالىق سپورتتى دامىتۋ ماقساتىندا وسى جىلدىڭ ناۋرىز-ماۋسىم ايلارى ارالىعىندا «شىمكەنت جاستار ليگاسى» جارىستارى سپورتتىڭ 4 تۇرىنەن (فۋتبول، ۆولەيبول، باسكەتبول، شاحمات) وتكىزىلۋدە.

ءار اۋدانعا قاراستى مەكتەپتەر ءتورت توپقا ءبولىنىپ، ناۋرىز-مامىر ايلارىندا ءوزارا سىناسىپ، توپ جەڭىمپازدارىن انىقتايدى. اۋداندارداعى ويىنداردان سوڭ ءوز توبىنان جەڭىمپاز بولىپ شىققان 16 مەكتەپتىڭ كوماندالارى مامىر ايىندا1/8 فينالدا ويىنداردى جالعاستىرادى. باسكەتبول، ۆولەيبول، فۋتبول جارىستارىنىڭ جەڭىمپازدارى ماۋسىم ايىندا قالا كۇنى مەرەكەسىندە ماراپاتتالادى.

ال شاحمات جارىسى قىركۇيەك ايىندا باستاۋ الادى. سونىمەن بىرگە، ءوز مەكتەبىنىڭ كومانداسىنا جىگەر بەرىپ، رۋحىن كوتەرۋ ماقساتىندا مەكتەپ جانىنان فان-كلۋبتار قۇرىلدى.

قازىرگى ۋاقىتتا ءال-فارابي اۋدانىندا ۆولەيبول جانە فۋتبول جارىستارى، ەڭبەكشى اۋدانىندا باسكەتبول جارىستارى وتۋدە.

10 ساۋىرگە دەيىن فۋتبولدان 27 مەكتەپ كومانداسى ءوزارا وينادى، 108 مەكتەپ كوماندالارى ويىندى ەندى باستايدى. باسكەتبولدان 94 كوماندا ويىن وتكىزدى، 36 مەكتەپ كومانداسى ەندى وينايدى. ۆولەيبولدان 96 كوماندا ويىن وتكىزدى، 35 كوماندا ەندى باستايدى. شاحماتتان 140 مەكتەپ كومانداسى قىركۇيەك ايىندا جارىستى باستايدى.

- پاندەميا دەنساۋلىق قادىرىن ۇعىندىردى. پەرەزيدەنت تاپسىرماسىنا سايكەس قالادا بۇقارالىق سپورتتى دامىتۋىمىز كەرەك. بۇل ماقساتتا قولعا الىنعان جاستار ليگاسىنىڭ ماڭىزى زور. جاستار اراسىندا سپورتتى دارىپتەۋدى ودان ءارى جەتىلدىرە ءتۇسۋ قاجەت،- دەدى قالا باسشىسى.

شىمكەنت قالاسى اكىمدىگىنىڭ ءباسپاسوز قىزمەتى

پىكىرلەر