سوڭعى جىلدارى ءجۇرىپ جاتقان قۇرىلىس جۇمىستارىنىڭ قارقىنىنا قاراساق، اۋدان ەكونوميكاسىنىڭ دامۋىندا وسى سالادا جاقسى ءۇردىستىڭ بارىنا كۋا بولامىز. قۇرىلىستىڭ كوبەيۋى الەۋمەتتىك ماسەلەلەردى شەشىپ، بوي كوتەرگەن تۇرعىن ۇيلەر، جاڭا مەكتەپتەر مەن بالاباقشالار، دارىگەرلىك امبۋلاتوريالار، دەمالىس ورىندارى جەرگىلىكتى تۇرعىنداردىڭ يگىلىگىنە جاراپ، جۇمىسسىزدىق دەڭگەيىنىڭ ازايۋىنا دا ءوز ۇلەسىن قوسارى ءسوزسىز. وتكەن جىلداعىداي بيىل دا اۋدانىمىزدا وسىنداي وندى جۇمىستار جالعاسىن تاۋىپ، بىرقاتار ماڭىزدى نىسانداردىڭ ىرگەتاسى قالانۋدا.
وسى رەتتە ءبىز اۋداندىق قۇرىلىس ءبولىمىنىڭ باس مامانى باقىتجان ماشراپپەن بىرگە بىرقاتار وكرۋگتەردە بولىپ، سالىنىپ جاتقان نىسانداردى ارالاپ وتتىك.
باسپانا ماسەلەسى شەشىلۋدە
حالىقتىڭ تۇرمىس جاعدايىن جاقسارتاتىن كورسەتكىشتەرىنىڭ ءبىرى تۇرعىن ۇيمەن قامتاماسىز ەتۋ ەكەنى بەلگىلى. ونىڭ ۇستىنە ءار قازاقتىڭ باسپاناسى تەك تۇراتىن ءۇيى عانا ەمەس، سونداي-اق، جاقىندارىن كۇتىپ، قوناق قابىلدار قۇتحاناسى، كيەلى قارا شاڭىراعى ەكەنى انىق. وسى رەتتە ءبىزدىڭ اۋدانىمىزدا جەر تەلىمدەرى بەرىلىپ، بيىل بىرقاتار جەكە تۇرعىن ۇيلەردىڭ قۇرىلىسى اۋقىمدى تۇردە جۇرگىزىلۋدە.
ماسەلەن، اۋدانىمىزعا قاراستى شامالعان اۋىلىنداعى «ۇشقوڭىر» سپورت مەكتەبىنىڭ ماڭىنا جاقىن ورنالاسقان جەردىڭ اۋماعىندا 20 ساتىپ الۋ قۇقىعىنسىز جالعا بەرىلەتىن، جەر ءۇيدىڭ قۇرىلىسى جۇرگىزىلۋدە. 262 ملن. 404 مىڭ تەڭگە قارجى قاراستىرىلعان بۇل قۇرىلىستىڭ اياقتالۋى اعىمداعى جىلدىڭ مامىر ايىنا جوسپارلانعان. جالپى، 1,3 گەكتار اۋماقتى الىپ، «نۇرلى جەر» باعدارلاماسى اياسىندا سالىنىپ جاتقان بۇل ءۇيدىڭ جوبالىق-سمەتالىق قۇجاتتارى 2019 جىلى «ارس لتد» جشس-مەن ازىرلەنىپ، وسى جىلدىڭ قاڭتار ايىندا مەملەكەتتىك ساراپتامادان ءساتتى وتكەن ەدى. ماقۇلدانعاننان كەيىن ونىڭ قۇرىلىس جۇمىستارى «اس-ستروي» جشس-نە بەرىلىپ، قۇرىلىس كومپانياسى وتكەن جىلدىڭ تامىز ايىندا جۇمىسىن باستاپ كەتتى.
64 شارشى مەتر جەردى الاتىن ءۇيدىڭ بارلىعى دەرلىك ءۇش بولمەلى. وعان قوسا ءار ءۇيدىڭ قاسىندا قوسالقى زاتتاردى قويۋعا ارنالعان قوسىمشا سارايشىق تا سالىنعان. مۇنان بولەك، ادامداردىڭ قولايلىلىعى ءۇشىن ينفراقۇرىلىم (جەر استى قازاندىق، سۋ، گاز، جارىق جۇيەلەرى) نىساندارىنىڭدا قۇرىلىستارى اياقتالدى. ال، بۇگىندە كوشەلەر جاسالۋدا.
سونىمەن قاتار، «الماتى – بىشكەك» كۇرە جولىنا جاقىن ورنالاسقان ايتەي اۋىلىنا قاراستى «ومىرۇزاق» تۇرعىن ءۇي كەشەنىندە 30 گا. جەر تەلىمىندە ەكى قاباتتى «تاۋنحاۋس» ستيلىندە سالىنعان 520 پاتەرلىك 130 ءۇي بوي كوتەرۋدە. جوبالاۋ-سمەتالىق قۇجاتتارىن ازىرلەۋگە 18,85 ملن. تەڭگە قاراجات بولىنگەن بۇل ءۇي بۇگىندە ءۇش كەزەڭمەن سالىنىپ جاتىر. ناقتىراق ايتقاندا، جالپى 9 ملرد. تەڭگە قاراجات بولىنگەن قۇرىلىستىڭ ەكىنشى كەزەڭى 2020 جىلدىڭ جەلتوقسان ايىندا اياقتالىپ، 50 ءۇي سالىندى، وسى جىلدىڭ ماۋسىم ايىندا بىتەتىن ءۇشىنشى كەزەڭدە 50 ءۇي سالىنادى. ال، ءتورتىنشى كەزەڭ اعىمداعى جىلى باستالىپ 30 ءۇي بوي كوتەرەتىن بولادى.
باقىتجان ابۋتۇراپۇلىنىڭ ايتۋىنشا، تۇرعىزىلىپ جاتقان ۇيلەر ۋاقتىلى سالىنىپ، ءارى ساپالى بولۋى ءۇشىن ونىڭ قۇرىلىس جۇمىستارىن «كورپوراتسيا اق وردا» جشس، «كازسترويپودرياد» جشس، «دانەكەر» جشس، «ۋمر-6» جشس سياقتى بىرقاتار كومپانيالار جۇرگىزىپ جاتىر. بۇل تاۋنحاۋستىڭ ءبىر ەرەكشەلىگى، مۇندا ءبىر ءۇي ءتورت وتباسىنا ارنالعان. ءار وتباسىنىڭ ءوزىنىڭ جەكە باقشاسىنا ارنالعان جەر اۋماعى بار، وعان قوسا، ءار ءۇيدىڭ الدىندا كىشىگىرىم اۆتوتۇراق تا ورنالاسقان. جوعارىدا ايتىپ وتكەن شامالعان اۋىلىنداعى ۇيلەردەگى سياقتى مۇندا دا جەراستى قازاندىق، سۋ، گاز، جارىق جۇيەلەرى تولىقتاي جۇرگىزىلىپ، بۇگىندە قۇرىلىسشىلار جولداردى اسفالتتاۋ جۇمىستارىن جۇرگىزۋدە.
الداعى ۋاقىتتا مۇندا مەكتەپ، بالالارعا ارنالعان ويىن الاڭدارى مەن ساياباق سالىناتىن بولادى.
دولاندا 25 كەلۋشىگە ارنالعان دارىگەرلىك امبۋلاتوريا سالىنىپ جاتىر
اۋدانىمىزدا تۇرعىن ۇيلەردىڭ قۇرىلىسىنان بولەك، الەۋمەتتىك عيماراتتاردىڭ قۇرىلىس جۇمىستارى دا قارقىندى جۇرۋدە. سونداي نىساننىڭ ءبىرى – رايىمبەك اۋىلدىق وكرۋگىنە قاراستى دولان اۋىلىنداعى دارىگەرلىك امبۋلاتوريا.
«جۇمىسپەن قامتۋ – 2020 جول كارتاسى» باعدارلاماسى اياسىندا سالىنىپ جاتقان دارىگەرلىك امبۋلاتوريا قۇرىلىسىنا وبلىستىق بيۋدجەتتەن 296,295 ملن. تەڭگە بولىنگەن بولاتىن. قۇرىلىس-مونتاج جۇمىستارىن «گولدەن سيتي» جشس-گى جۇرگىزىپ جاتقان زاماناۋي ءبىر قاباتتى مەديتسينالىق مەكەمە اۋىسىمىندا 25 ادامدى قابىلداي الادى.
العاشقى كومەك كورسەتۋگە بارلىق جاعداي جاسالىپ، ارنايى اسپاپتارمەن جابدىقتالعان ەمدەۋ، ەكپە بولمەسى، ءتىس دارىگەرى، گينەكولوگيا، تەراپەۆت كابينەتتەرى بار مەكەمەنىڭ قۇرىلىس جۇمىستارىن اياقتاۋ اعىمداعى جىلدىڭ مامىر ايىنا بەلگىلەنگەن.
ۇشتەرەك اۋىلىندا مەكتەپ سالىنىپ جاتىر
اۋداننىڭ الەۋەتى ارتىپ، ءوسىپ-وركەندەۋىمەن قاتار، حالىق سانى دا ەداۋىر ارتۋدا. وسى ورايدا ءتۇرلى سالادا كوكەيكەستى ماسەلە دە تۋىندايتىنى انىق. بۇل رەتتە جىلدان-جىلعا ءوسىپ كەلە جاتقان تۇرعىنداردىڭ مەكتەپكە دەگەن قاجەتتىلىگىن وتەۋ ماڭىزدى ەكەنى بەلگىلى. سوندىقتان اۋدان اكىمدىكگى بۇل ماسەلەنى كۇن تارتىبىنەن تۇسىرگەن ەمەس. بۇگىندە اۋدانىمىزدا ءبىلىم سالاسى بويىنشا ءۇش اۋىسىمدىلىقتى جويۋ ماقساتىندا مەكتەپتەردىڭ دە قۇرىلىس جۇمىستارى جاقسى جالعاسۋدا.
ماسەلەن، اعىمداعى جىلى قولدانىسقا بەرىلەتىن جامبىل اۋىلدىق وكرۋگىندەگى ەكى اۋىسىمدى مەكتەپ سولاردىڭ قاتارىنا جاتادى. وتكەن جىلدان باستاپ قۇرىلىس جۇمىستارىن مەردىگەر مەكەمە «سپ NEFT» جشس جۇرگىزىپ جاتقان 450 ورىندىق مەكتەپتىڭ سالىنۋىنا جالپى 1 ملرد. 289 ملن. تەڭگە قاراستىرىلعان. 2,2 گەكتار اۋماقتى الاتىن ءۇش قاباتتى ءبىلىم ۇياسىنىڭ جۇمىسى بيىل اياقتالىپ، قولدانىسقا بەرىلەدى.
سونىمەن قاتار، ايتەي اۋىلدىق وكرۋگىنىڭ ۇشتەرەك اۋىلىندا دا بيىل 600 ورىندىق جاڭا مەكتەپ بوي كوتەرەتىن بولادى. ەكى گەكتار اۋماقتا قۇرىلىسىن مەردىگەر مەكەمە «اقوردا» جشس-ءى جۇرگىزىپ جاتقان ءبىلىم مەكەمەسى ءۇش قاباتتى بولماق. وبلىستىق بيۋدجەتتەن 2 ملرد. 006 ملن. تەڭگە قاراجات قاراستىرىلىپ، ونىڭ قۇرىلىس جۇمىستارىن 2022 جىلى اياقتاۋ جوسپارلاۋدا.
ەكى مەكتەپتىڭ اۋماعىندا دەنە شىنىقتىرۋمەن اينالىسۋعا ارنالعان ستاديوندار مەن ويىن الاندارى سالىناتىن بولادى.
ءيا، ەلىمىزدە ورىن العان كۇردەلى جاعدايعا قاراماستان، اۋدانىمىزدا قۇرىلىس سالاسى وركەندەپ، كوپتەگەن الەۋمەتتىك نىساندار سالىنعانىن جوعارىدا سارالاپ شىقتىق. بۇل كۇن ساناپ كوركەيىپ، جاڭارىپ، جاسارىپ كەلە جاتقان اۋدانىمىزدىڭ دامۋىنا ۇلكەن ىقپالىن تيگىزەتىنى انىق.
اقتوتى مىرزابەكقىزى
