شىمكەنتتە كوشەلەرگە جارىق شامدار ورناتۋ جۇمىستارى باستالدى

2503
Adyrna.kz Telegram

شىمكەنت قالاسى ەنەرگەتيكا جانە كوممۋنالدىق شارۋاشىلىق باسقارماسى تاراپىنان قالاداعى ن.نازارباەۆ داڭعىلى مەن ج.شاياحمەتوۆ كوشەسىنەن ق.پاتەەۆ كوشەسى ارالىعىندا تۇنگى جارىق شامدار ورناتىلىپ جاتىر.

اتالعان كوشەلەردىڭ بويىنا جارىق شامدار ورناتۋ جۇمىستارى وسى جىلدىڭ 1 ناۋرىزىنان باستالدى. تۇرعىنداردىڭ قاۋىپسىزدىگىن ارتتىرۋ ماقساتىندا جاسالىنىپ جاتقان بۇل جۇمىسقا بارلىعى 17 مامان جۇمىلدىرىلعان. قازىرگى ۋاقىتتا 2 شاقىرىم كوشەگە 51 جارىقتاندىرۋ باعانالارى ورناتىلىپ، جۇمىستىڭ 70 پايىزى اياقتالىپ وتىر. 2021 جىلدىڭ 15 ساۋىرىنە دەيىن كوشەنى جارىقتاندىۋ جۇمىستارى تولىق اياقتالىپ، پايدالانۋعا بەرىلەدى دەپ جوسپارلانۋدا.

بۇدان وزگە، 2021-2023 جىلدارى كوشەنى جارىقتاندىرۋ مەن ونى كۇتىپ ۇستاۋ بويىنشا مەملەكەتتىك-جەكەمەنشىك ارىپتەستىك اياسىندا 16,4 ملرد. تەڭگەگە بىرقاتار جوبالار جۇزەگە اسىرىلادى. ياعني، جوبا اياسىندا 312 كوشە جارىقتاندىرىلىپ، ەنەرگيا ۇنەمدەيتىن LED شامدار ورناتىلماق. اتاپ ايتقاندا، اباي اۋدانىنداعى 83 كوشە، ءال-فارابيدەگى 42 كوشە، ەڭبەكشىدەگى 89 كوشە، قاراتاۋداعى 98 كوشە جارىقتاندىرىلادى. ناتيجەسىندە قالانى تۇڭگى جارىق شامدارمەن قامتۋ كورسەتكىشى 70 پايىزعا جەتەتىن بولادى.

ايتا كەتەرلىگى، قالا كوشەلەرىن جارىقتاندىرۋدا ءبىرىنشى كەزەكتە شاعىناۋداندارداعى الەۋمەتتىك نىساندار ورنالاسقان (مەكتەپ، ەمحانا، بالاباقشا جانە ت.ب), ورتالىق ماڭىزعا (قوعامدىق كولىك قاتىنايتىن) يە كوشەلەرىن قامتۋ جوسپارلانىپ وتىر.

شىمكەنت قالاسى اكىمدىگىنىڭ ءباسپاسوز قىزمەتى

 

 

پىكىرلەر