نۇر-سۇلتاندا 25 جاستاعى قىز ZL-30 ماركالى فرونتال تيەگىشتى ايداپ كەتتى، دەپ حابارلايدى «ادىرنا» ۇلتتىق پورتالى Sputnik قازاقستان سايتىنا سىلتەمە جاساپ.
جۇك تيەگىشتىڭ جۇرگىزۋشىسى پوليتسياعا قوڭىراۋ شالىپ، ۇرلىق تۋرالى حابارلاعان. ەر ادام بەلگىسىز بىرەۋ اۆتوتۇراقتان قۇرىلىس كومپانياسىنا تيەسىلى ZL-30 تيەگىشىن ايداپ كەتكەنىن جەتكىزدى.
پوليتسەيلەر تۇندە جۇرگىزۋشى تانىس قىزىن ۇيىنە شاقىرعانىن انىقتادى. داستارقان باسىندا ول ىشىمدىك ءىشىپ، ماس بولىپ قالعان. قوناق ەر ادامنىڭ ۇيىقتاعانىن كۇتىپ، كىلتتى الىپ، جۇك تيەگىشتى ايداپ اكەتكەن.
پوليتسيا باقىلاۋ كامەرالارى تۇسىرگەن ۆيدەونى كورسەتتى. قىز تۇندە قالادا قاتتى جىلدامدىقپەن ءجۇرىپ، جولداردا قاۋىپتى مانەۆرلەر جاساعان.
سونىمەن قاتار ول برۋسيلوۆسكي كوشەسىندە جول اپاتىن جاساپ، Mercedes اۆتوكولىگىنە زاقىم كەلتىرگەن. قىزدىڭ تۇنگى ساياحاتىن پاترۋلدىك پوليتسەيلەر توقتاتتى.
قۇقىق قورعاۋ ورگاندارى قىزدىڭ كولىك قۇرالىن جۇرگىزۋگە رۇقسات بەرەتىن كۋالىگى جوق ەكەنىن اتاپ ءوتتى.
ۇستالعان 25 جاستاعى قىز پوليتسيا بولىمىنە جەتكىزىلدى. ول ارنايى تەحنيكامەن قىدىرعىسى كەلگەندىكتەن وسىنداي قادامعا بارعانىن ايتتى. قازىر تەرگەۋ جۇرگىزىلىپ جاتىر.
