بۇل زاڭ جوباسىن كىمدەر ازىرلەپ، ءماجىلىستىڭ قاراۋىنان وتكىزىپ، سەناتتىڭ ماقۇلداۋىنا تاپسىرىپ وتىر؟
سەناتتا قارالىپ جاتقان قۇجاتتا ورمان شارۋاشىلىعىنا قاتىستى ساناتتاعى جەرلەردى شەتەلدىكتەر مەن ازاماتتاعى جوق ادامدارعا 25 جىلعا جالعا بەرۋ مەن اۋكتسيون ارقىلى الۋ بويىنشا باپ بار. وزدەرىڭىز بىلەسىزدەر، كەشەگى جۇمىسى ناتيجەسىز اياقتالعان جەركومدا تەك اۋىلشارۋاشىلىعى ساناتىنداعى جەرلەر عانا تالقىلانىپ، وزگە ساناتتاعى جەرلەردى اينالشىقتاپ ءوتتى. سول اينالشىقتاۋدىڭ ارقاسىندا 48 باپتىڭ 2 تارماعى قوعامنىڭ، ازاماتتاردىڭ نازارىنا ىلىكتى.
دوس كوشىمنىڭ ايتۋىنشا، بۇل زاڭ جوباسى ەرتەرەكتە پرەزيدەنتتىڭ ايتۋىمەن دايىندالعان. ءبىراز عانا بۇرىن پرەزيدەنتتىڭ ءوزى "جەر شەتەلدىكتەرگە ساتىلمايدى جانە جالعا بەرىلمەيدى" دەدى. پرەزيدەنت ايتقان نەگىزى اۋىلشارۋاشىلىعىنا قاتىستى جەر ساناتتارى بولاتىن. ال ەندى كەشەگى جەركومنىڭ بۇل باپقا ەشقانداي دا قاتىسى بولماعان. سوندا بۇل زاڭ جوباسىن كىمدەر ازىرلەپ، ءماجىلىستىڭ قاراۋىنان وتكىزىپ، سەناتتىڭ ماقۇلداۋىنا تاپسىرىپ وتىر؟
الدە بۇل جەردە جاسىرىن ەكىنشى جەركوم جۇمىس جاساپ جاتىر ما؟
بۇل زاڭ جوباسى قازىر سەناتتا تالقىلانىپ جاتىر. 48 باپتىڭ 2 تارماعىنىڭ تەكستى مىناداي:«ساۋدا-ساتتىقتىڭ (كونكۋرستاردىڭ، اۋكتسيونداردىڭ) جەڭىمپازدارىنا – شەتەلدىكتەر مەن ازاماتتىعى جوق ادامدارعا اۋىل شارۋاشىلىعى ءوندىرىسىن، ورمان ءوسىرۋدى، قوسالقى اۋىل شارۋاشىلىعىن جۇرگىزۋ ءۇشىن جەر ۋچاسكەلەرى 25 جىلعا دەيiنگى مەرزىممەن جالداۋ شارتتارىمەن ۋاقىتشا جەر پايدالانۋعا بەرىلەدى». زاڭ جوباسىندا اۋىل شارۋاشىلىعىن ءوندىرىسى مەن ورمان ءوسىرۋدى، قوسالقى اۋىل شارۋاشىلىعىن جۇرگىزۋ ءۇشىن دەپ انىق ايتىپ جاتىر.
بۇل زاڭ جوباسىنىڭ سەناتتا قارالىپ جاتقانىنان دەپۋتات ايدوس سارىمنىڭ دا، ەلگە بەلگىلى ساياساتكەر دوس كوشىمنىڭ دە، جەركوم مۇشەسى، قويشى الماسبەكتىڭ دە حابارى جوق. اقورداعا تابانى ءبىرتابان جاقىنداۋ، ۇكىمەت پەن پارلامەنت كەڭسەلەرىندە وسىنداي جاسىرىن پروتسەستەر ءجۇرىپ جاتقانىن بۇل ازاماتتاردىڭ بىلمەي قالعانى قالاي بولدى؟
ەگەر دە اتالعان زاڭ جوباسى سەناتتا ماقۇلداناتىن بولسا، ورمان شارۋاشىلىعى ساناتىنداعى جەرلەر 25 جىلعا اۋكتسيونمەن شەتەلدىكتەرگە جالعا بەرىلەدى. ال بۇل باپقا قوسارلارعان اۋىلشارۋاشىلىعى ءوندىرىسى، قوسالقى اۋىلشارۋاشىلىعىن جۇرگىزۋ دەگەنى تاعى بار. ارى قاراي ءوزىڭىز ويلانىپ كوزىڭىز!
سول ماڭايداعى ازاماتتاردان جاۋاپ كۇتەمىن!
مۇمكىن، مۇحتار تايجان اعامىز جاۋاپ بەرەر...!
بەكبولات قارجان،
"ادىرنا" ۇلتتىق پورتالى
