الماتى وبلىسى ەڭبەكشىقازاق اۋدانىندا بىرەۋدىڭ جالعىز بالاسى كىسى قولىنان قايتىس بولدى. شەلەك اۋىلىنىڭ ماڭىنداعى سارىبۇلاق ەلدىمەكەنىندە ەربول نۇرلان ەسىمدى جىگىتتى اۋىلداستارى ۇرىپ سوققان. توعىز كۇن اۋرۋحانادا ەس-ءتۇسسىز جاتقان جابىرلەنۋشى كەشە ءتۇنى كوز جۇمىپتى، دەپ حابارلايدى «ادىرنا» ۇلتتىق پورتالى azattyq-ruhy سايتىنا سىلتەمە جاساپ.
مارقۇمنىڭ اكەسى نۇرلان بەيسەنباەۆ وقيعانىڭ 11 ءساۋىر كۇنى بولعانىن ايتادى. اۋىل تۇرعىنى مەدەت تۇراجانوۆ 18 جاستاعى بالاسى داۋلەت تۇراجان ەكەۋى شەلەك اۋىلىندا مۇعالىم بولىپ جۇمىس ىستەيتىن جىگىتتى ءوز ۇيىنە ىزدەپ كەلگەن. الايدا ورتالىققا كەتكەن ەربول نۇرلان سول كۇنى كەشكە ءمان-جايدى ءبىلۋ ءۇشىن تۇراجانوۆتاردىڭ ۇيىنە ءوز اياعىمەن بارىپتى. الايدا سول كۇنى ول سوققىعا جىعىلعان.
ەس-ءتۇسسىز جاتقان بالاسىن ۇيىنە اكەلگەن اكەسى جەدەل جاردەم شاقىرادى. كەشكە شەلەكتىڭ ورتالىق اۋرۋحاناسىنا جەتكىزىلگەن ەربولدىڭ نە بولعانىن ايتىپ بەرۋگە شاماسى كەلمەگەن. ءبىر اپتادان استام ۋاقىت ءوز-وزىنە كەلە الماي اۋرۋحانادا جاتقان جىگىتتى دارىگەرلەر ولىمنەن اراشالاي الماپتى. جاراقاتى اۋىر بولعان. ميىنا قان قۇيىلعان. دەنەسىنىڭ كوپ جەرىندە اۋىر جاراقات بولعان. مارقۇم شەلەك اۋىلىنداعى ورتا مەكتەپتەردىڭ بىرىندە مۇعالىم بولىپ جۇمىس ىستەگەن. نۇرلان بەيسەنباەۆ بالاسىنىڭ ولىمىنە سارىبۇلاق اۋىلىنىڭ ورتالىق كوشەسىندە تۇراتىن مەدەت تۇراجانوۆ ەسىمدى ازامات پەن ونىڭ جاقىندارىن كىنالاپ وتىر. جالعىز ۇلىن ءبىر ەمەس بىرنەشە كىسىنىڭ جابىلىپ ۇرىپ-سوققانىن كورگەن كۋاگەرلەر بار. الايدا جەرگىلىكتى پوليتسيا ون كۇن بويى كۇدىكتىلەردى ۇستاماعان. تەك ءولىم مەن ءومىردىڭ اراسىندا جاتقان جىگىت جان تاپسىرعاندا بارىپ، مەدەت تۇراجانوۆ قۇرىقتالىپتى.
وسى وقيعاعا قاتىسى بار دەلىنگەن تۇراجانوۆتار وتباسى مۇعالىمدى اۋلاسىندا ۇرىپ-سوققانىن جوققا شىعارمايدى. ءۇيدىڭ ۇلكەنى داۋلەت تۇراجان مارقۇمنىڭ شەشەسىمەن تەلەفون ارقىلى سويلەسىپ جۇرگەنىن ايتادى. جۇك تاسىمالىمەن اينالىسىپ، سول كۇنى ۇيىنە كەلگەن مەدەت تۇراجانوۆ ايەلىنىڭ تەلەفونىنا تۇنگى مەزگىلدە ەربول نۇرلاننان قوڭىراۋ تۇسكەنىن بايقاپ قالعان. ەرلى-زايىپتىلار اراسىنداعى قىزعانىشتىڭ سوڭى وسىلاي ادام ولىمىنە اپارعان دەگەن بولجام بار. ون سەگىز جاستاعى داۋلەت سول كۇنى ەربولدىڭ دوستارىن بالتامەن قورقىتىپ، قۋىپ جىبەرگەنىن مويىنداپ وتىر. ودان كەيىن ءۇيدىڭ اۋلاسىندا قىلمىسقا كۇدىكتى اكەسىنىڭ مارقۇمدى تەپكىنىڭ استىنا العانىن دا جوققا شىعارمادى.
بۇل وتباسىنداعىلار مۇعالىممەن سويلەسىپ ءجۇرۋى مۇمكىن دەپ سەزىككە ىلىنگەن بەس بالانىڭ اناسىن دا ۇيىنەن قۋىپ جىبەرگەن. ال اكەسىن كەشە پوليتسيا ۇستاپ اكەتىپتى. الماتى وبلىستىق پوليتسيا دەپارتامەنتى العاشقىدا قىلمىستىق كودەكستىڭ 107-بابى، 1-ءبولىمى بويىنشا (دەنساۋلىققا قاساقانا اۋىرلىعى ورتاشا زيان كەلتiرۋ) دەرەگى بويىنشا ءىس قوزعاعان. ال كەشە ءىستى قىلمىستىق كودەكستىڭ 106-بابى 3-ءبولىمى بويىنشا قايتا قوزعاپ، كۇدىكتىگە «كiنالi ادامعا دارمەنسiز كۇيدە ەكەنiن كورە تۇرا ءجابىر كورسەتىپ، ادامدى ۇرلاۋمەن نە كەپiلگە الۋمەن ۇشتاسقان قىلمىسقى باردى» دەگەن ايىپ تاققان.
جەرگىلىكتى پوليتسيانىڭ ادام دەنساۋلىعىنا قاساقانا اۋىر زيان كەلتىرگەن ازاماتتى ون كۇن بويى وقشاۋلاماعانى تۇسىنىكسىز. ول ءوزىنىڭ ايەلىنە دە وسىنداي اۋىر دەنە جاراقاتىن سالۋى مۇمكىن نەمەسە ءولتىرۋى دە كادىك ەدى، دەيدى اۋىل تۇرعىندارى.
بۇگىن دارىگەرلەر مارقۇم ەربول نۇرلاننىڭ دەنەسىن تۋىستارىنا بەرگەن. ەرتەڭ جەرلەنەدى. جىگىتتىڭ اكەسى قۇزىرلى ورگانداردان تەرگەۋدى ءادىل جۇرگىزىپ، جالعىز بالاسىنىڭ ولىمىنە كىنالى وزگە تۇلعالاردى دا انىقتاپ، جاۋاپقا تارتۋدى سۇرايدى.
"ادىرنا" ۇلتتىق پورتالى
