كەربۇلاق اۋدانىنا الماتى وبلىسى اكىمىنىڭ ورىنباسارى سەرىك تۇرداليەۆ جۇمىس ساپارىمەن كەلىپ، ديقان قاۋىمىنىڭ، سونىڭ ىشىندە، «قىزىلجار» وندىرىستىك كووپەراتيۆىنىڭ جۇمىسىمەن تانىستى.
«قىزىلجار» وندىرىستىك كووپەراتيۆىنىڭ باسشىسى ايدىن نۇرتازين كەلگەن قوناقتاردى مەكەمە جۇمىسىمەن تانىستىردى. ونىڭ ايتۋىنشا، بۇگىنگى تاڭدا كووپەراتيۆ قاراماعىندا 50 ادام جۇمىس ىستەيدى. ۇجىمعا تيەسىلى 1700 گەكتار ەگىستىك جەر بار. ونىڭ 1300 گەكتارىنا كۇزدىك بيداي سەبىلگەن، بۇگىندە تىرمالاۋ جۇمىسى جۇرگىزىلۋدە. ال 350 گەكتار جەرگە جازدىق ارپا ەگۋ جۇمىسى باستالىپ كەتكەن. بۇل جۇمىستاردىڭ باسىندا 20-دان استام ادام ءجۇر.
– اۋا رايى قولايلى بولىپ تۇر. قولداعى بار تەحنيكانى جۇمىلدىرىپ، ءار كۇندى ءتيىمدى پايدالانۋ ماقساتىندا جۇمىس جاساۋدامىز، – دەيدى 1995 جىلدان وسى كووپەراتيۆتە جۇمىس ىستەپ، كەيىنگى ءۇش جىلدا كووپەراتيۆتى باسقارىپ وتىرعان ازامات.
وندىرىستىك كووپەراتيۆتىڭ تەحنيكاسى دا كوكتەمگى دالا جۇمىستارىنا ساقاداي-ساي، جانار-جاعارماي جەتكىلىكتى. شارۋا جايىمەن تولىق تانىسقان سەرىك مەلىسۇلى الا جازداي القاپتى باپتاپ، قامباسىن استىققا تولتىرۋدى ويلاعان كووپەراتيۆ ۇجىمىنا ىزگى نيەتىن ءبىلدىرىپ، جازدىڭ اپتاپ ىستىعىنا، جاۋىن-شاشىنعا قاراماي ماڭداي تەرمەن اتقارىلاتىن جۇمىسقا تابىس تىلەدى
