دەپۋتات ناريمان تورەعاليەۆ قىزىلوردا وبلىسى جاڭاقورعان اۋدانىندا جۇزەگە اسىرىلۋعا ءتيىس بولعان «سىرداريا جانە تالاپ توپتىق سۋ قۇبىرىنىڭ قۇرىلىسى» جوبالارىنا قاتىستى پروبلەمالاردى كوتەردى، دەپ حابارلايدى "ادىرنا" ۇلتتىق پورتالى. بۇل تۋرالى قر پارلامەنتى سەناتىنىڭ Instagram پاراقشاسىندا ايتىلدى.
دەپۋتات ءوز ساۋالىن پرەمەر-ءمينيستردىڭ ورىنباسارىنا جولداي وتىرىپ، تالاپ جانە سىرداريا توپتىق سۋ قۇبىرلارىنىڭ ىسكە قوسىلۋىن جىلدامداتىپ، تىزبەگە ەنگىزىپ، سۋبسيديالاۋعا قاتىستى ماسەلەلەرىن شەشۋگە ىقپال جاساۋىن سۇرادى.
جوبا بويىنشا اۋداننىڭ 28 ەلدىمەكەنىندە تۇرىپ جاتقان 43 مىڭعا جۋىق حالىق اۋىز سۋمەن قامتىلۋ كەرەك ەدى. سىرداريا توپتىق سۋ قۇبىرى 5,2 ملرد. تەڭگە قارجىعا سالىنىپ، پايدالانۋعا بەرىلدى. ال، تالاپ توپتىق سۋ قۇبىرىنىڭ قۇرىلىس جۇمىستارىنا 5,5 ملرد. تەڭگە جۇمسالعان.
"قازىرگى تاڭدا اۋىز سۋ حالىققا كۇنىنە ءبىر-ەكى ساعاتقا بەرىلىپ،ۋاقىتپەن شەكتەلگەن. وسى جوبالاردىڭ تولىق ىسكە قوسىلماۋى سالدارىنان تۇرعىندار اۋىز سۋدى اۋلادا ورنالاسقان شاحتالىق قۇدىقتاردان نەمەسە كىشى ۇڭعىمالاردان الىپ ىشۋگە ءماجبۇر", دەدى سەنات دەپۋتاتى ناريمان تورەعاليەۆ.
دەپۋتاتتىڭ ايتۋىنشا، 11 ملرد. تەڭگەگە جۋىق قاراجات جۇمسالىپ، 2014 جىلدان باستاپ جۇرگىزىلگەن جوبانىڭ تۇپكىلىكتى ناتيجەسىن حالىق كورمەي وتىر. سەبەبى، تالاپ سۋ ءوندىرۋ كەشەنىندە قازىلعان 8 ۇڭعىمادان قۇم ارالاس سۋ شىعىپ جاتىر. سونىمەن قاتار، اتالعان ەكى توپتىق سۋ قۇبىرى سۋمەن جابدىقتاۋدىڭ ەرەكشە ماڭىزدى توپتىق جانە وقشاۋ جۇيەلەرىنىڭ تىزبەسىنە ەنگىزىلمەگەن. ياعني، حالىق اۋىز سۋعا تولىق تاريفپەن تولەپ وتىر.
"ادىرنا" ۇلتتىق پورتالى
