استانادا زەينەتكەر مەن ونىڭ ۇلى سەگىز جىلدان بەرى وزدەرىنە تيەسىلى پاتەردى ساقتاپ قالۋ ءۇشىن كۇرەسىپ كەلگەن، دەپ حابارلايدى “ادىرنا” ءتىلشىسى.
وتباسىنى باسپاناسىنان ماجبۇرلەپ شىعارۋ ارەكەتى قۇرىلتاي دەپۋتاتتارى يليا تەرەنچەنكو مەن سنەجاننا يماشەۆانىڭ ارالاسۋىنان كەيىن توقتاتىلدى.
ايدوس بالتاەۆ وسىدان سەگىز جىل بۇرىن كاسىبىن دامىتۋ ءۇشىن ينۆەستور ىزدەگەن. ناتيجەسىندە تاراپتار ءوزارا كەلىسىمگە كەلگەنىمەن، ينۆەستور 10 ميلليون تەڭگە كولەمىندەگى قاراجاتتى بەرۋدەن باس تارتقان. سوعان قاراماستان، كەلىسىمشارتتا اقشانىڭ كاسىپكەرگە بەرىلگەنى كورسەتىلگەن. كەيىن ينۆەستور پاتەردى بوساتۋ تۋرالى تالاپپەن سوتقا جۇگىنگەن.
وتباسىنىڭ ايتۋىنشا، بۇدان كەيىن جەكە سوت ورىنداۋشىلارى پاتەردى نارىقتىق باعاسىنان ءۇش ەسە تومەن باعالاپ، ەلەكتروندى ساۋداعا شىعارعان. ولار اۋكتسيوننىڭ ءوتۋ زاڭدىلىعىنا دا كۇمان كەلتىرەدى. سەبەبى ساۋداعا ءبىر عانا ساتىپ الۋشى قاتىسقان.
ايدوس بالتاەۆتىڭ سوزىنشە، وتباسىنى باسپاناسىنان ماجبۇرلەپ شىعارۋ ارەكەتتەرى دە بولعان. ءتىپتى ەسىكتى بۇزۋعا ارەكەت جاسالعان. ال پاتەردە ونىڭ زەينەت جاسىنداعى اناسى تۇرادى.
وتباسى مۇشەلەرى جەكە سوت ورىنداۋشىسىنىڭ ارەكەتىنە قاتىستى شاعىمدانىپ، E-Otinish پلاتفورماسى ارقىلى قۇرىلتاي دەپۋتاتتارى يليا تەرەنچەنكو مەن سنەجاننا يماشەۆاعا جۇگىنگەن.
دەپۋتاتتار ءوتىنىشتى قاراپ، جاعدايدى زەردەلەۋگە كىرىسكەن. ناتيجەسىندە زەينەتكەردى باسپاناسىنان ماجبۇرلەپ شىعارۋ ارەكەتىن توقتاتىلعان. بۇل وتباسىنا جىلىتۋ ماۋسىمى اياقتالعانعا دەيىن پاتەردە تۇرىپ، مەنشىك قۇقىعىنا قاتىستى داۋدى سوت تارتىبىمەن شەشۋگە قوسىمشا مۇمكىندىك بەردى.
يليا تەرەنچەنكونىڭ ايتۋىنشا، مۇنداي جاعدايدا ازاماتتاردىڭ، اسىرەسە الەۋمەتتىك وسال توپتاعى ادامداردىڭ كونستيتۋتسيالىق قۇقىقتارىن قورعاۋ ماڭىزدى.
وتباسى مۇشەلەرى دەپۋتاتتارعا كورسەتكەن كومەگى مەن ماسەلەنى جەدەل قاراستىرعانى ءۇشىن العىس ءبىلدىردى. زەينەتكەر حانزادا بالتاەۆانىڭ سوزىنشە، دەپۋتاتتار وعان قۇقىقتارىن ءتۇسىندىرىپ قانا قويماي، مەنشىك قۇقىعىن قورعاۋ ءۇشىن قانداي قادامدار جاساۋ كەرەگىن دە كورسەتكەن.
قازىر وتباسىنىڭ باستى ماقساتى – جىلجىمايتىن مۇلىككە قاتىستى داۋدى زاڭ اياسىندا شەشىپ، باسپاناسىنىڭ وزدەرىنە تيەسىلى ەكەنىن سوتتا دالەلدەۋ. ال دەپۋتاتتار ازاماتتاردىڭ وتىنىشتەرىن قاراۋ جانە ولاردىڭ قۇقىقتارىن قورعاۋ باعىتىنداعى جۇمىستى جالعاستىراتىنىن جەتكىزدى.
