دەپۋتات قاراپايىم قىزمەتكەرلەردىڭ جالاقىسىن كوتەرۋدى ۇسىندى

5856
Adyrna.kz Telegram

پارلامەنت ءماجىلىسىنىڭ دەپۋتاتى، «اق جول» فراكتسياسىنىڭ مۇشەسى ماقسات رامانقۇلوۆ قاراپايىم قىزمەتكەرلەردىڭ جالاقىسىن كوتەرۋدى ۇسىندى. ايتۋىنشا، جىل سايىن ينفلياتسيا قىسىپ بارا جاتسا دا، سانيتار، ەدەن جۋشى، جەدەل جاردەم جۇرگىزۋشىسى سىندى تەحنيكالىق قىزمەتكەرلەر 60 مىڭ تەڭگەگە كۇنەلتىپ ءجۇر، دەپ حابارلايدى كتك ارناسى.

«جەدەل جاردەم جۇرگىزۋشىلەرىنىڭ جالاقىسى شامامەن 70-75 مىڭ تەڭگە جانە ول بەس جىلدان استام ۋاقىت بويى جوعارىلاعان جوق. مەكتەپتەر مەن بالاباقشا تەحنيكالىق قىزمەتكەرلەرىنىڭ جالاقىسى شامامەن 50 مىڭ تەڭگە. مۇنداعى قىزمەتكەرلەردىڭ كوپشىلىگى ءوز جۇمىسىن ادال اتقارادى جانە ونداعان جىل بويى وسىلاي جۇمىس ىستەيتىن شىنايى ەنتۋزياستتار»، - دەيدى ماقسات رامانقۇلوۆ.

دەپۋتاتتىڭ ايتۋىنشا، جىل سايىن مۇعالىمدەر مەن دارىگەرلەردىڭ جالاقىسى 20-30 پايىزعا ارتىپ جاتادى. ال ولاردىڭ قاسىنداعى جاي قىزمەتكەرلەر، ياعني، سانيتارلار، اسسيستەنتتەر، ەدەن جۋشىلار، جەدەل جاردەم جۇرگىزۋشىلەرى، مۇراجاي، ونەر، مەكتەپ، بالاباقشا، كىتاپحانا، مۇراعات سالاسىنداعى وزگە دە قىزمەتكەرلەر نازاردان تىس قالۋدا.

ءتىپتى تاريحشىلار، ونەرتانۋشىلار اراسىندا جوعارى ءبىلىمى بار قىزمەتكەرلەردىڭ ورتاشا جالاقىسى 60 مىڭ تەڭگەنىڭ اينالاسىندا، دەيدى ول.

ماجىلىسمەننىڭ سوزىنشە، ايلىقتىڭ ازدىعىنان وسى ساناتتاعى قىزمەتكەرلەر يپوتەكالىق ۇيگە قولى جەتپەي، ونداعان جىل بويى جالدامالى پاتەردە ءجۇر.

"ادىرنا" ۇلتتىق پورتالى

پىكىرلەر