الماتى وبلىسى اكىمىنىڭ ءبىرىنشى ورىنباسارى لاززات تۇرلاشوۆ جۋىردا الاكول اۋدانىنا ارنايى ءىس-ساپارمەن باردى.
وڭىردە قۇرىلىس سالاسىندا اتقارىلىپ جاتقان جۇمىستاردى باعامداپ، ءتيىستى تاپسىرمالار بەرگەن ل.تۇرلاشوۆ ەڭ الدىمەن اۋدان ورتالىعى ءۇشارال قالاسىنىڭ شىعىس بولىگىندە جاڭادان بوي كوتەرىپ جاتقان شاعىن اۋدانعا اتباسىن بۇردى. مۇندا قۇرىلىسى ءجۇرىپ جاتقان 20 جانە 60 پاتەرلى تۇرعىن ۇيلەردىڭ جاعدايىن تارازىلاپ، بەلگىلەنگەن ۋاقىتتا پايدالانۋعا بەرىلۋىن قاداعالاۋدى تاپسىردى.
- ءار نىسان وسى وڭىرگە، اينالاعا ءار بەرىپ تۇرۋى كەرەك. ەڭ باستىسى، حالىققا قولايلى بولۋى شارت. سوندىقتان قۇجاتتاردىڭ زاڭ اياسىندا راسىمدەلۋىمەن قاتار سالىنۋ ءتارتىبى، اباتتاندىرىلۋى مەن ساپاسىنا، ءسانى مەن ساۋلەتىنە باسا نازار اۋدارعان ءجون. بۇل باعىتتاعى جۇمىستاردى قاداعالاپ، زاڭسىزدىقتارعا جول بەرمەۋ - وزەكتى ماسەلە، - دەدى لاززات ماحاتۇلى.
سونداي-اق، اتاۋلى جۇمىستارعا جاۋاپتى تۇلعالار مەن مەردىگەرلەرگە تاپسىرمالار بەردى. ايدىندى ءوڭىردىڭ ايبىنىن اسىرىپ وتىرعان تىرەك سالالارىنىڭ ءبىرى تۋريزم بولعان سوڭ، ل.تۇرلاشوۆ كول بويىنداعى اقشي اۋىلدىق وكرۋگىندە دە اتقارىلىپ جاتقان جۇمىستارمەن تانىستى. وبلىستاعى الەۋەتتى تۋريستىك ايما جىلىنا ميلليوننان استام مەيمان قابىلداۋعا قۋاتتى اۋىلدىڭ پوتەنتسيالى جوعارى. سوندىقتان دا جاعانى شايعان سۋ تولقىندارىنا توسقاۋىل قويىپ، بەكىتۋ جۇمىستارىن جۇرگىزۋ كۇن تارتىبىنەن تۇسكەن ەمەس. قازىرگى تاڭدا 13,550 شاقىرىمعا جۇرگىزىلىپ جاتقان جاعالاۋ بەكىتۋ جۇمىستارىن زەردەلەپ، وسى ىسكە جاۋاپتى «سپەتسستروي» جشس وكىلدەرىمەن اڭگىمەلەستى. مۇنان بولەك، اۋىلداعى اۋىزسۋ، كارىز جۇيەلەرىن جۇرگىزۋ قارقىنىن ارتتىرۋ كەرەگىن دە تىلگە تيەك ەتتى.
- الاكول – وبلىستاعى تۋريستىك الەۋەتى وتە جوعارى ءوڭىر. شەتەل ازاماتتارى مەن ەل تۇرعىندارىنا ساپالى قىزمەت كورسەتۋدەن بۇرىن قاۋىپسىزدىك پەن زامان سۇرانىسىنا ساي قولجەتىمدىلىكتى قامتاماسىز ەتۋ ماڭىزدى شارۋا. سونىڭ ىشىندە كول جاعاسىن بەكىتۋ ءىسىن كەشەۋىلدەتپەۋ كەرەك. بۇل باعىتتاعى جۇمىستارعا قاداعالاۋ دا قاتاڭ، - دەدى وبلىس اكىمىنىڭ ورىنباسارى ل.تۇرلاشوۆ.
