اسپان دەگەن تۇنىپ تۇرعان رومانتيكا عوي، شىركىن... جاي عانا دەمىڭدى ىشكە تەرەڭىرەك تارتىپ، كوككە ءبىر كوز تاستاۋدىڭ ءوزى قيالىڭدى شارىقتاتىپ اكەتپەيدى مە؟ قاناتىن كەڭگە جايىپ، كوكتە ەركىن سامعاعان قۇس اتاۋلىعا قاراعان ادام بالاسى اسپانعا ۇشۋدى ەجەلگى زاماننان باستاپ-اق ارمانداي باستادى. «ۇشاتىن كىلەم» ءتارىزدى قيال-عاجايىپ اڭگىمەلەر مەن اڭىزدار وسىعان ايقىن دالەل بولسا كەرەك. الايدا ادامزات اسپان الەمىن تەك 20 عاسىردان باستاپ قانا باعىندىرا باستادى. امەريكاندىق اعايىندى ەكى جىگىتتىڭ ارقاسىندا ومىرگە ۇشاق كەلدى.
ۇشاقتار ادام ءومىرىن ايتارلىقتاي جەڭىلدەتكەنىمەن، جەكە ۇشاق يەلەنۋگە ەكىنىڭ ءبىرىنىڭ قولى جەتە بەرمەيدى. سوندىقتان دا، ادامداردىڭ كوپشىلىگى اۆتوكولىكتەردىڭ رولىنە وتىردى. وسىدان سوڭ ادامدار ۇشاتىن اۆتوموبيلدەر تۋرالى دا قيالداي باستادى.
اسىرەسە ۇلكەن قالالاردا ساعاتتاپ كولىك كەپتەلىسىندە تۇرعان كەزدە استىنداعى ماشيناڭا قانات ءبىتىپ، ۇشىپ كەتكەنىن قالايتىنىن ايتپاسا دا تۇسىنىكتى.
ءيا، راسىمەن دە ۇشاتىن اۆتوكولىك شىعارۋدى ارماندايتىن ادامداردىڭ سانى الەمدە ميلليونداپ سانالادى. وسىنى ەسكەرگەن ينجەنەرلەر مەن ونەرتاپقىشتار ۇشاتىن اۆتوكولىكتەردىڭ ونداعان سىزبالارىن سىزىپ، كونتسەپتسيالارىن جاساعانىمەن، اسپاندا دا، جەردە دە جۇرە الاتىن تەمىر تۇلپاردى ازىرگە ەشكىم جاساپ شىعارا المادى. قازىرگى تاڭدا مۇنداي يدەيانى جۇزەگە اسىرۋ تەحنيكالىق تۇرعىدان مۇمكىن ەمەس بولىپ تۇر.
ايتكەنمەن دە، اۆيارومانتيكتەردىڭ وڭاي بەرىلە سالاتىن ءجونى جوق. اقش-تىڭ ورەگون شتاتىندا تۇراتىن دەن حارريس ەسىمدى ديزەينەر بۇرىن قولدانىستا بولعان بيزنەس دجەتتى سالتاناتتى ليمۋزينگە اينالدىرۋعا شەشىم قابىلداپتى. شاعىن LearJet ۇشاعىن ليمۋزينگە اينالدىرۋ يدەياسىن جۇزەگە اسىرۋعا 2 جىل ۋاقىت، 40 000 جۇمىس ساعاتى مەن 1 ميلليون دوللار قاراجات جۇمىسالىپتى. ناتيجەسىندە دۇنيەگە الەمدە ەشبىر تەڭدەسى جوق بىرەگەي ليمۋزين كەلدى. وعان Limo-Jet دەپ ات قويىلدى.
ۇشۋ قىزمەتىن توقتاتقان ۇزىندىعى 42 فۋت نەمەسە 13 مەترلىك ۇشاقتىڭ قاناتتارىن الىپ تاستاپ، فليۋزەلياجىنا بولاتتىن جاسالعان ارنايى جاقتاۋ ورناتىلىپ، 28 ديۋيم بولاتىن دوڭگەلەكپەنجانە گازوتۋربينالىق قوزعالتقىش ديناميگىمەن جابدىقتالدى.
ەرەكشە ليمۋزينگە 400 اتتىڭ كۇشىنە تەڭ بولاتىن 8,1 ليترلىك «Chevrolet Vortec V8»قوزعالتقىشى ورناتىلدى. ليمۋزين بەنزينمەن جۇرەدى جانە ساعاتىنا 160 كم/ساع جىلدامدىقپەن قولعالادى. سالماعى – 5443 كگ.
العاش رەت 2018 جىلدىڭ جازىندا سىناقتان ءساتتى وتكەن ليمو-دجەتتىڭ ىشىنە 18 ادام سىيادى جانە قاراپايىم ليمۋزيندەردەن باستى ايىرماشىلىعى يلليۋميناتورلارى عانا. 42 ديۋيمدىك پلازمالىق تەلەديدار، جۇمساق ديۆاندار، ءارتۇرلى جارىق تۇسىرەتىن جانە مۋزىكالىق اپپاراتتارمەن ت.ب. بارلىق كەرەك-جاراقپەنجابدىقتالعان لينۋزينگە ارنايى پاتەنت تە بەرىلگەن.
بارلىق قۇجاتتارى رەتتەلگەن سوڭ يەسى لينۋزين-ۇشاقتى ساتۋعا شەشىم قابىلداپ، «Mecum Auctions» اۋكتسيونىنا شىعارادى. العاشىندا كەم دەگەندە 5 ميلليون دوللاردى قۇرايدى دەپ كۇتىلگەنىمەن، اقىر سوڭىندا 600 مىڭ دوللارعا دەيىن ارزانداتىلادى. قىرسىق شالعاندا ەرەكشە ءليمۋزيندى ساتىپ الۋعا ەشكىم دە قىزىعۋشىلىق تانىتپايدى. 2020 جىلعى ماۋسىمداعى العاشقى اۋكتسيوندا ساتىلماي قالعان ليمۋزين-ۇشاق وسى جىلى قايتادان ساتىلىمعا شىعارىلماق. الايدا قازىردىڭ وزىندە ساتىپ الۋعا نيەتتى ادام تابىلماپتى. وسىلايشا، الەمدەگى جالعىز ءتۇيىر ليمۋزينگە اينالدىرىلعان ۇشاق ەشكىمگە كەرەكسىز بولىپ شىقتى...
ورالبەك وتەعۇلوۆ،
«ادىرنا» ۇلتتىق پورتالى
