باتىس قازاقستان وبلىسىنىڭ تەرەكتى اۋدانىنداعى مۋزىكالىق مەكتەپتىڭ مەڭگەرۋشىسى تيكتوك تۇسىرگەنى ءۇشىن جۇمىسىنان قۋىلدى، دەپ حابارلادى "استانا" ارناسى.
بيلەپ ءجۇرىپ، ءبىر ساتتە جۇمىسسىزداردىڭ قاتارىنا قوسىلعان ساندۋعاش بيسەنعاليەۆا باسشىسىنىڭ بۇل شەشىمىمەن كەلىسپەيدى. ايتۋىنشا، بۇعان ديرەكتورمەن اراداعى ارازدىق سەبەپ بولىپتى. ساندۋعاش بيسەنعاليەۆا مەكتەپ ديرەكتورى مەن باس ەسەپشىنىڭ اقشا جىمقىرعانىن اڭعارىپتى.
وسىلايشا قۇزىرلى ورگاندارعا ارىزدانعان. اۋديتتىك تەكسەرۋ كەزىندە مەكتەپ باسشىلىعىنىڭ 26 ميلليون تەڭگە ۇرلاعانى انىقتالعان. سودان كەيىن ديرەكتور قىر سوڭىمنان قۋدالاپ، قالاي دا ءوش الۋعا تىرىستى دەيدى جۇمىسسىز ۇستاز.
"قاڭتاردا قارجى پوليتسياسىنا ارىز بەردىك، سودان بەرى سىيعىزبادى. ورنىڭنان الىپ تاستايمىن، بۇل جۇمىستى ىستەمەيسىڭ دەدى! تيك-توكتاعى مەنىڭ پريۆاتنىي اككاۋنتىم. وقۋشىلارىممەن بىرگە تۇسەمىن. ءان ايتامىن، ونىڭ ۇستىنە ءبيشىمىن عوي. ءبىر كۇندە جۇمىستان شىعارىپ تاستاۋى مەنىڭ 25 جىلدىق ەڭبەگىمدى جوققا شىعارعانى عوي", - دەيدى ساندۋعاش بيسەنعاليەۆا.
ادىلدىك ىزدەگەن مۇعالىم تەرەكتى اۋداندىق ءبىلىم ءبولىمى مەن ەڭبەك ينسپەكتسياسىنا شاعىمدانعان. ويتكەنى كەك الۋعا تىرىسقان مەكتەپ ديرەكتورى زاڭدى بەلدەن باسىپ، ءبىر كۇندە بىرنەشە رەت سوگىس جاريالاپتى. ءتىپتى اۋىرىپ ۇيىندە جاتسا دا، جۇمىستان شىعارىپ جىبەرگەن. "وسىلايشا ديرەكتور تيكتوكتاعى ۆيدەومدى تەرىس ماقساتتا ءتۇرلى ۋاتساپ-توپتارعا تاراتىپ، كۇيە جاعۋعا تىرىستى. جەكە ۆيدەومدى كوپتىڭ تالقىسىنا ۇسىنىپ، ەتيكا ادەبىنەن اتتاپ كەتتى" دەيدى كۇيىنگەن ۇستاز. مۇنى اۋداندىق ءبىلىم ءبولىمى راستاپ وتىر.
"مەكتەپ ديرەكتورى ءوز قىزمەتكەرىن جۇمىستان شىعارماستان بۇرىن، ءبىلىم ءبولىمىن ەسكەرتۋى كەرەك. بىراق ول بۇل تۋرالى ءتىس جارمادى. سوندىقتان ديرەكتورى قىزمەت بابىن اسىرا پايدالاندى دەپ سانايمىن. ءارى ادامنىڭ جەكە ۆيدەوسىن تاراتۋعا بولمايدى. تۋىنداعان داۋدى زاڭ اياسىندا شەشۋگە تىرىسامىز", - دەيدى تەرەكتى اۋداندىق ءبىلىم ءبولىمىنىڭ مەڭگەرۋشىسى جانارگۇل قۇسايىنوۆا.
