اسكەري قايراتكەر، پولكوۆنيك، اسكەري عىلىمداردىڭ كانديداتى — كيم سەرىكبايۇلى سەرىكباەۆ 87 جاسىندا ومىردەن ءوتتى. بۇل تۋرالى مارات ءجۇنىس-بەك Facebook پاراقشاسىندا ءماىلىم ەتتى، دەپ حابارلايدى "ادىرنا" ءتىلشىسى.
مارات ءجۇنىس-بەك جازباسىندا:
"كەشەگى كەڭەستىڭ تۇسىندا شەن تاعىپ، شەكپەن كيگەن قازاق بالاسىنىڭ از بولعانى كوپكە ءمالىم. ءبىز بىلەتىن پولكوۆنيك كيم سەرىكبايۇلى سەرىكباەۆ سول از عانا شوعىردىڭ ىشىندە شوقتىعى بيىك تۇلعانىڭ ءبىرى بولا ءبىلدى. ونى مەنەن ارتىق بىلەسىزدەر...
تۇرمىس-تىرشىلىگىندە جانە عۇمىرلىق قىزمەتىندە تون رايساداي اسىل اپامىزدىڭ سۇيىكتى جارى، بالالارىنىڭ قامقور اكەسى، نەمەرەلەرىنىڭ اقىلگوي اتاسى، تاۋەلسىز قازاق اسكەرىنىڭ نەگىزىن قالاۋشىلاردىڭ ءبىرى، قازاق اسكەري عىلىمىنىڭ تارلانى، ماڭدايىمىزعا بىتكەن تۇڭعىش اسكەري عالىم، كوپتەگەن كىتاپتاردىڭ جانە عىلىمي جۇمىستاردىڭ اۆتورى، باۋىرجانتانۋشى، قارا سوزدەن قامشى ورگەن ءسوز زەرگەرى، تانىمال گەنەرالدار مەن پولكوۆنيكتەردى تاربيەلەپ شىعارعان ۇستاز، ناعىز ءىستىڭ ادامى، داناگوي ءبىلىم يەسى، باتاگوي اقساقال بولىپ ەدى...
وسىنداي اسىل ازامات بۇگىن ومىردەن ءوتىپتى... جاقسىلىقتىڭ جاناشىرى ەدى عوي... اسقان بەدەلىنە اسقاقتاماعان جان ەدى عوي...
تۇرپاتى بولەك سىزدەي تارلان تۇلعامەن، ءبىلىمدار جانمەن تانىس بولعانىمدى، ارالاسقانىمدى، ءار سوزىڭنەن ومىرلىك ءتالىم العانىمدى، داستارحانداس جانە دامدەس بولعانىمدى، ت.ب. تولىپ جاتقان ادامي قاسيەتتەرىڭدى كورگەنىمدى قۇرمەت تۇتۋشى ەدىم. كەزدەسە قالساق قۇشاق جايىپ سالەم بەرىپ، تەلەفونمەن سويلەسسەك تىك تۇرىپ تىڭداۋشى ەدىم ءسوزىڭدى. تۋماساڭ دا، تۋعان اعامداي باتاڭدى بەرىپ ءجۇرۋشى ەدىڭ...
قوش بول، قادىرلى اعا!
قوش بول، جولداس پولكوۆنيك!" دەپ جازدى.
سەرىكباەۆ كيم سەرىكبايۇلى - 1934 جىلدىڭ 14 قاڭتارىندا تۋعان. اقتوبە وبلىسى،حرومتاۋ اۋدانى، كوپتوعاي اۋىلىنىڭ تۋماسى.
1952 — 56 جىلدارى قازىرگى قازمۋ-دە، ۋفا اسكەري ۋچيليششەسىندە وقىعان.
3-دارەجەلى “كسرو قارۋلى كۇشتەرىندە وتانعا قىزمەت ەتكەنى ءۇشىن” وردەنىمەن، كوپتەگەن مەدالدارمەن ماراپاتتالعان.
"ادىرنا" ۇلتتىق پورتالى
