Áskerı qaıratker, polkovnık, áskerı ǵylymdardyń kandıdaty — Kım Serikbaıuly Serikbaev 87 jasynda ómirden ótti. Bul týraly Marat Júnis-Bek Facebook paraqshasynda máilim etti, dep habarlaıdy "Adyrna" tilshisi.
Marat Júnis-Bek jazbasynda:
"Keshegi Keńestiń tusynda shen taǵyp, shekpen kıgen qazaq balasynyń az bolǵany kópke málim. Biz biletin polkovnık Kım Serikbaıuly Serikbaev sol az ǵana shoǵyrdyń ishinde shoqtyǵy bıik tulǵanyń biri bola bildi. Ony menen artyq bilesizder...
Turmys-tirshiliginde jáne ǵumyrlyq qyzmetinde ton Raısadaı asyl apamyzdyń súıikti jary, balalarynyń qamqor ákesi, nemereleriniń aqylgóı atasy, táýelsiz Qazaq áskeriniń negizin qalaýshylardyń biri, qazaq Áskerı ǵylymynyń tarlany, mańdaıymyzǵa bitken tuńǵysh áskerı ǵalym, kóptegen kitaptardyń jáne ǵylymı jumystardyń avtory, Baýyrjantanýshy, qara sózden qamshy órgen sóz zergeri, tanymal generaldar men polkovnıkterdi tárbıelep shyǵarǵan ustaz, naǵyz istiń adamy, danagóı bilim ıesi, batagóı aqsaqal bolyp edi...
Osyndaı asyl azamat búgin ómirden ótipti... Jaqsylyqtyń janashyry edi ǵoı... Asqan bedeline asqaqtamaǵan jan edi ǵoı...
Turpaty bólek Sizdeı tarlan tulǵamen, bilimdar janmen tanys bolǵanymdy, aralasqanymdy, ár sózińnen ómirlik tálim alǵanymdy, dastarhandas jáne dámdes bolǵanymdy, t.b. tolyp jatqan adamı qasıetterińdi kórgenimdi qurmet tutýshy edim. Kezdese qalsaq qushaq jaıyp sálem berip, telefonmen sóılessek tik turyp tyńdaýshy edim sózińdi. Týmasań da, týǵan aǵamdaı batańdy berip júrýshi ediń...
Qosh bol, qadirli aǵa!
Qosh bol, joldas polkovnık!" dep jazdy.
Serikbaev Kım Serikbaıuly - 1934 jyldyń 14 qańtarynda týǵan. Aqtóbe oblysy,Hromtaý aýdany, Kóptoǵaı aýylynyń týmasy.
1952 — 56 jyldary qazirgi QazMÝ-de, Ýfa áskerı ýchılıesinde oqyǵan.
3-dárejeli “KSRO Qarýly kúshterinde Otanǵa qyzmet etkeni úshin” ordenimen, kóptegen medaldarmen marapattalǵan.
"Adyrna" ulttyq portaly
