ەل پرەزيدەنتى ق.توقاەۆ ءوز جولداۋىنا بۇقارا مەن بيلىك اراسىن جاقىنداتۋ ماقساتىندا "حالىق ۇنىنە قۇلاق اساتىن مەملەكەت" تۇجىرىمداماسىن ۇسىنعان بولاتىن. وسى تۇجىرىمدى جۇيەلى جۇزەگە اسىرۋ ماقساتىندا الماتى وبلىسىنا قاراستى شەڭگەلدى اۋىلدىق وكرۋگىندە حالىققا ءبىر جەردەن ەلەكتروندى نەگىزدە قىزمەت كورسەتەتىن سەرۆيستىك اكىمدىك اشىلدى. وعان الماتى وبلىسى اكىمىنىڭ ورىنباسارى جەڭىس تۇياقوۆ، قازاقستان رەسپۋبليكاسى سىبايلاس جەمقورلىققا قارسى ءىس-قيمىل اگەنتتىگىنىڭ الماتى وبلىسى بويىنشا دەپارتامەنتى باسشىسىنىڭ ورىنباسارى جاندوس جۇماباەۆ قاتىستى.
ورتالىقتا حالىق پەن مەملەكەتتىك قىزمەتكەر اراسىندا اشىقتىق، قوعامدىق ديالوگ، كوپتىڭ مۇڭ-مۇقتاجىنا جەدەل كومەك كورسەتۋ ءپرينتسيپى نەگىزىندە جەدەل قىزمەت جۇزەگە اسىرىلماقشى.
جينالعاندار الدىندا ءسوز العان وبلىس اكىمىنىڭ ورىنباسارى جەڭىس تۇياقوۆ وبلىستا وسىنداي 20 سەرۆيستىك ورتالىقتىڭ اشىلعاندىعىن ايتتى. ونىڭ سوزىنشە، حالىققا كورسەتىلەتىن 170 مەملەكەتتىك قىزمەتتىڭ بۇگىندە 153-ءى ەلەكتروندى نەگىزگە كوشىرىلگەن.
جەڭىس شىلبىنۇلى سەرۆيستىك ورتالىققا مۇگەدەكتەر ارباسىمەن كىرەتىندەر ءۇشىن جاسالعان پاندۋس پەن شاقىرۋ قوڭىراۋىنىڭ ساپاسىنا كوڭىل ءبولدى. سەرۆيستىك اكىمدىكتە جەر قاتىناستارى، ساۋلەت، تكش جانە تۇرعىن ءۇي ينسپەكتسياسى، الەۋمەتتىك قامسىزداندىرۋ، جۇمىسقا ورنالاستىرۋ، ءبىلىم بەرۋ، قۇجاتتاردى قابىلداۋ جانە بەرۋ ماسەلەلەرىنە جاۋاپتى ماماندار قىزمەت ەتەدى.
ورتالىقتىڭ سالتاناتتى اشىلۋىندا قاپشاعاي قالاسىنىڭ اكىمى نۇرلان قۇماتاەۆ اتالمىش وكرۋگ بويىنشا شەڭگەلدى، كەربۇلاق، سارىبۇلاق، قوسقۇدىق، اقوزەك اۋىلدارىندا وزىنە-ءوزى قىزمەت كورسەتۋ بۇرىشتارى بار ەكەنىن ايتتى. ول بولاشاقتا قۇجات راسىمدەۋ ماسەلەسىن بۇدان دا كەڭەيتە تۇسەتىندەرىن جەتكىزدى.
شارادا قاپشاعاي قالاسى اقساقالدار كەڭەسىنىڭ توراعاسى امانگەلدى بەسباەۆ سويلەپ، قاپشاعاي مەن شەڭگەلدىنىڭ اراسى 47 شاقىرىم ەكەنىنە توقتالىپ، ەلدى مەكەننەن سەرۆيستىك ورتالىقتى اشۋدىڭ تيىمدىلىگىنە توقتالدى.
