الماتى وبلىستىق پوليتسيا دەپارتامەنتى ءجاسوسپىرىمنىڭ ولىمىنە قاتىستى ءبىر اقپاراتتى جوققا شىعاردى، دەپ حابارلايدى “ادىرنا” ۇلتتىق پورتالى.
تالعاردا 16 جاستاعى شەرزات بولاتتىڭ ءومىرى قوعامدىق رەزونانس تۋدىردى. ونى ءولتىردى دەگەن كۇدىكپەن ۇستالعان جەتى ادامنىڭ ۇيىمداسقان قىلمىستىق توپ مۇشەسى ەكەنى تۋرالى اقپارات جالعان بولىپ شىققان.
بۇل تۋرالى الماتى وبلىستىق پوليتسيا دەپارتامەنتى باستىعىنىڭ مىندەتىن اتقارۋشى سەرىك شالحاروۆ مالىمدەدى.
"ۇيىمداسقان قىلمىستىق توپتىڭ نە ەكەندىگى تۋرالى ناقتى تۇسىنىك بەرەتىن باپ بار. ول ءۇشىن ۇيىمداسقان قىلمىستىق توپ بىرنەشە رەت قىلمىس جاساعان بولۋى قاجەت. بىراق مۇندا ءبىر عانا وقيعا. الەۋمەتتىك جەلىلەردەن "حۋتورسكيلەر" تۋرالى اقپاراتتى دا كوردىك. ەگەر ءسىز تالعار اۋدانىندا تۇرساڭىز، كەڭەس زامانىندا وسىلاي اتالعان "حۋتورسكايا" اۋدانى تۋرالى ەستىگەن شىعارسىز. قازىر قاتەلەسپەسەم، "بىرلىك" دەپ اتالادى. بارلىق تۇرعىنداردى وسى قىلمىستىق توپتىڭ مۇشەسى بولدى دەپ ايتا المايمىز. بىزدە مۇنداي قاراقشىلار مەن توپتار جوق", – دەدى شالحاروۆ.
دەپارتامەنت باسشىسى سوتقا دەيىنگى تەرگەپ-تەكسەرۋ كەزىندە اقپاراتتى تاراتۋعا تىيىم سالاتىن قىلمىستىق-پروتسەستىك كودەكستىڭ بابىنا سىلتەمە جاساپ، قاماۋعا الىنعانداردىڭ جەكە باسى تۋرالى اقپارات بەرۋدەن باس تارتتى.
دەگەنمەن الەۋمەتتىك جەلىدە ولاردىڭ سۋرەتتەرى مەن اتى-جوندەرى تاراپ كەتتى.
پوليتسەيلەر كۇدىكتىلەردەن ءۇش پىشاق (ەكى اسحانا پىشاعى، ءبىر قالتا پىشاعى) مەن تىركەلمەگەن قارۋ تاركىلەگەن. سونداي-اق، “پوليتسيا قىلمىس ورنىنا كەش جەتتى” دەگەن اقپاراتقا دا تۇسىنىكتەمە بەردى.
"وقيعا تۋرالى پوليتسياعا ساعات 00:40-تا قوڭىراۋ ءتۇستى. قىزمەتكەرلەر وقيعا ورنىنا 9-10 مينۋتتا جەتتى، ياعني ستاندارتقا ساي. دەگەنمەن، ىشكى تەكسەرۋ جۇرگىزىلەدى", – دەدى سەرىك شالحاروۆ.
