Biz qandaı elmiz?
Keshe Jamal Jamanbaeva tergeý ızolıatorynan aýrýhanaǵa jetkizildi. Buǵan Jamaldyń densaýlyǵynyń kúrt nasharlaýy sebep. 19. 03. 21. kúni óz qolymen jazǵan hatynda 5 - shi naýryzda júrek tusynyń shanshýy údegenin, altysynda asqynyp jedel járdem shaqyrýdy suraǵanyn, biraq suranysy oryndalmaǵany, 7-si kúni ishtegi dáriger tek qan qysymyn ólsheýmen shektelgenin jazǵan. Arada eki apta ótkende 18 - inde ÝZI, EKG jasalǵan. Biraq onyń nátıjesin de kórsetpegen. Hat 19- shy naýryzda jazylǵanyn aıttyq. Onshaqty kún jan aýrýy men tán aýrýynyń azabyn kórgen.
Bul bizdegi pogon taqqan adam keıpindegilerdiń degenine jetý úshin qandaı da áreketke barýdan taıynbaıtynyna dálel. Demek arada ótken onshaqty kúnde Jamaldyń jaǵdaıy jaqsarmaǵan. Qazir ol jatqan palata qatań kúzet baqylaýda. Eshkimdi oǵan qatystyrmaıdy, jolatpaıdy. Otyzynshy jyldardaǵy GPÝ, NKVD tusyndaǵy "halyq jaýlarynyń" da týys- jaqyndarymen kezdesý múmkindigi bolǵan.
Osyǵan baılanysty saýaldar bar. Mańǵystaýdyń ákimshiliginiń, zań oryndarynyń bolmasa densaýlyq salasyndaǵy shenýnikteri nemese baspasóz qyzmetteri nege málimet berýge qulyqsyz? Qoǵamda rezonans týǵyzyp otyrǵan máseleni jarııa etý negizgi mindet. Olaı bolsa bular nege dármensiz? Buǵan bir ǵana jaýap bar. Ol - bizde bılik pen halyqtyń eki polıýs, eki dúnıede ekendigi. Qulyqsyzdyq, merezdik, jaltaqtyq, mansapqorlyq, jaǵympazdyq túptep kelgende beısharalyq, satqyndyqqa ákeledi. Jasyryp keregi ne? Biz osyǵan jettik. Boıymyzda qyzdyń kóz jasyna, qaryndastyń muńyna, ananyń zaryna qulaq túrý, janashyrlyq, ıneniń jasýyndaı bolsa da selt etý qasıetterinen aıyrylǵanbyz.
Buryn orystan kóretinbiz. Orys demekshi, olar bılegen tusta az da bolsa ádildik boldy. Jazǵanyńnan nátıje shyǵatyn. 1989 jyly Beıneý ROVD- syna B. Spataev degen maıor basshynyń orynbasary bolyp keldi. Tili ay, bylapyt, árkimge tıisip, qutyryp júrdi. Birde keshkisin joldastarmen kınoǵa barsam, árkimge tıisip boqtap júr eken. Kópshilik oryn ekenin aıtyp edim, órekpip jaǵama jarmasty. El qarap tur. Kıkiljińnen keıin artynsha men medıınalyq personaldan adam shaqyrttym. Erteńgi kúni saý ekenimdi dáleldeý úshin. Keıinnen onymen jaýlasyp júrgen aǵa tergeýshiniń Máskeýge KSRO Bas Prokýrory Sýharevke jazǵan aryzyn durystadym. Eki aıda ishki ister salasynan shettetilip, búkil sheninen aıyrylyp isti boldy.
Qazir sol kez bolsa myna joqtan bar qurap, zeńbirekpen torǵaı atyp júrgen "myqtylarmen" sóz basqa bolar edi. Endi Jamaldy qarap jatqan dárigerlerdiń Gıppokrattyń antyna adaldyǵy, organdar tarapynan bolatyn qysymǵa qaramaı jasalar qorytyndysy qajet.
Jamaldyń isine qatysty Toqaevqa hat daıyndaýdamyn. Ony jelide jarııalaýdyń paıdasy joq. Sirá, oqymaıtyndyqtan qolyna tikeleı tabystaýdyń retin keltirý kerek. Ekinshi - másele, ol - baýyzdalar toqty da tuıaǵyn serpıdi. El ekenimiz ras bolsa onda halyqtyń qoldaýyna súıenemiz.
"Úsh Qııan" baspasynyń dırektory
Mahmýt Qosmambetov
