نۇر-سۇلتان قالاسىنداعى نازارباەۆ زياتكەرلىك مەكتەبىنىڭ 12-سىنىپ وقۋشىسى ءجانيا ابجان اقش-تىڭ بەس ۋنيۆەرسيتەتىنىڭ شاكىرتاقىسىن ۇتىپ الدى، دەپ حابارلايدى «ادىرنا» ءتىلشىسى.
ءجانيانىڭ ايتۋىنشا، اقش-تىڭ سەنت لۋيس، ۆاشينگتون & لي, تامپا جانە وڭتۇستىك فلوريدا ۋنيۆەرسيتەتتەرىنىڭ شاكىرتاقىسىنا يە بولعانىمەن، نوتر-دام ۋنيۆەرسيتەتىنىڭ جاۋابىن اسىعا كۇتكەن.
- بەس جوعارى وقۋ ورنىنان شاقىرۋ كەلدى. سونىڭ ىشىندە، ۆيردجينيا شتاتىندا ورنالاسقان ۆاشينگتون & لي ۋنيۆەرسيتەتى ەڭبەگىمە قاراي مەنىڭ وقۋ، جاتىن ورىن جانە تاماقتانۋ شىعىندارىن تولىعىمەن وتەيتىن شاكىرتاقىسىن ۇسىندى. ال سەنت لۋيس ۋنيۆەرسيتەتى پرەزيدەنتتىك شاكىرتاقى تاعايىندادى. وزگە ەكى جوعارى وقۋ ورنى دا ەڭ جوعارى شاكىرتاقى ۇسىندى. الايدا، مەن نوتر-دام ۋنيۆەرسيتەتىنىڭ جاۋابىن اسىعا كۇتىپ ءجۇردىم. سەبەبى، ول اقش-تىڭ ۇزدىك ۋنيۆەرسيتەتتەرىنىڭ رەيتينگىسىندە ۇنەمى جوعارى ورىندارعا يە. سونداي-اق، ول چيكاگو قالاسىنا جاقىن ورنالاسقان، بۇل، ءوز كەزەگىندە، الەمدىك كومپانيالاردا تاجىريبەدەن وتۋگە مۇمكىندىك بەرەدى. اتالمىش ۋنيۆەرسيتەت ءاۋ باستان مەنىڭ ارمانداعان ۋنيۆەرسيتەتتەرىمنىڭ ءبىرى بولدى. جوعارى اكادەميالىق جەتىستىكتەردەن بولەك, مەنى ۋنيۆەرسيتەت قاۋىمداستىعى قىزىقتىرادى. ستۋدەنتتەر ۇيىمشىلدىق پەن ۋنيۆەرسيتەت رۋحىن ەرەكشە اتاپ وتەدى. كوندوليزا رايس سياقتى تابىستى تۇلعالار مەن تۇلەكتەر ستۋدەنتتەرگە ءجيى ءدارىس وقيدى، - دەيدى ول.
ءجانيا – مەكتەپىشىلىك ءومىردىڭ بەلسەندى قاتىسۋشىسى، ءتۇرلى وليمپيادالارعا قاتىسىپ، ەرىكتىلىكپەن اينالىسىپ جۇرگەن العىر وقۋشى. ەكونوميكا، اعىلشىن جانە بيولوگيا پاندەرىن تەرەڭدەتىپ وقىپ جاتقان ونىڭ تاڭداۋى «كومپيۋتەرلىك عىلىمدار» ماماندىعىنا ءتۇستى. دەگەنمەن، الداعى ۋاقىتتا قوس ماماندىق الۋ ونىڭ جوسپارىندا بار.
- نوتر-دام ۋنيۆەرسيتەتى ۇسىنعان شاكىرتاقى وقۋ, جاتىن ورىن جانە جول شىعىندارىمدى تولىق وتەپ, مەديتسينالىق ساقتاندىرۋ جانە وقۋلىقتارمەن قامتاماسىز ەتەدى. وسى ورايدا، مەكتەبىمنىڭ، مۇعالىمدەرىمنىڭ بەرگەن ءبىلىمى مەن قولداۋى ءۇشىن ۇلكەن العىس بىلدىرگىم كەلەدى. العان ءبىلىمىمدى دۇرىس قولدانا وتىرىپ، ماگيستراتۋرا, PhD باعىتىندا بىلىكتىلىگىمدى ارتتىرعىم كەلەدى. ماقساتىما جەتۋدە «تەك قانا العا!» دەگەن ومىرلىك ۇستانىمىمنىڭ كومەكتەسەتىنىنە سەنىمدىمىن,- دەيدى جاس زياتكەر.
«ادىرنا» ۇلتتىق پورتالى
