رەسەي پرەزيدەنتى ۆلاديمير پۋتين موبيليزاتسيا، اسكەري جاعداي نەمەسە سوعىس ۋاقىتىندا اسكەري قىزمەت وتكەرۋ تۋرالى كەلىسىمشارت جاساي الاتىن سوتتالعان ازاماتتار ءتىزىمىن كەڭەيتەتىن زاڭعا قول قويدى. قۇجات قۇقىقتىق اقپاراتتىڭ رەسمي پورتالىندا جاريالاندى، دەپ حابارلايدى «ادىرنا» ءتىلشىسى.
زاڭ «اسكەري مىندەت جانە اسكەري قىزمەت تۋرالى» زاڭنىڭ 34-بابىنا وزگەرىستەر ەنگىزەدى. وزگەرىستەرگە سايكەس، كەلىسىمشارت بويىنشا اسكەري قىزمەتكە قابىلداۋعا كەدەرگى كەلتىرەتىن شەكتەۋلەر قاتارىنان قولما-قول اقشا، ەسىرتكى، قارۋ-جاراق، جارىلعىش زاتتار، يادرولىق ماتەريالدار جانە وزگە دە قاۋىپتى زاتتاردىڭ كونترابانداسىنا، بانديتيزمگە جانە قىلمىستىق قاۋىمداستىق ۇيىمداستىرۋعا قاتىستى بىرقاتار قىلمىس ءتۇرى الىنىپ تاستالدى.
تىزىمگە سونداي-اق كۇزەتىلەتىن نىسانعا زاڭسىز كىرۋ، وتىن-ەنەرگەتيكا كەشەنى نىساندارىنىڭ قاۋىپسىزدىگىن بۇزۋ، يادرولىق ماتەريالدارمەن زاڭسىز جۇمىس ىستەۋ جانە ولاردى ۇرلاۋ، مەملەكەتتىك قۇپياسى بار قۇجاتتاردى جوعالتۋ، زاڭسىز كوشى-قوندى ۇيىمداستىرۋ سەكىلدى قىلمىستار دا ەنگىزىلگەن.
ال كامەلەتكە تولماعانداردىڭ جىنىستىق قولسۇعىلماۋشىلىعىنا قارسى بىرقاتار قىلمىس ءۇشىن سوتتالعان ازاماتتارعا اسكەري قىزمەت تۋرالى كەلىسىمشارت جاساۋ قۇقىعى بەرىلمەيدى.
مەملەكەتتىك دۋما بۇل زاڭدى 22 شىلدەدە قابىلداپ، 24 شىلدەدە فەدەراتسيا كەڭەسى ماقۇلداعان.
قورعانىس ءمينيسترىنىڭ ورىنباسارى ۆيكتور گورەمىكيننىڭ ايتۋىنشا، قۇجات كەلىسىمشارت بويىنشا اسكەري قىزمەتكە تارتىلۋى مۇمكىن كانديداتتار سانىن ارتتىرۋعا مۇمكىندىك بەرەدى. ونىڭ سوزىنشە، سوتتىلىعى بار اسكەري قىزمەتكەرلەر باسقا كەلىسىمشارتشىلاردان بولەك ارنايى بولىمشەلەردە قىزمەت ەتەدى. سونداي-اق قورعانىس مينيسترلىگى مۇنداي اسكەري قىزمەتكەرلەرگە باس پروكۋراتۋرا، تەرگەۋ كوميتەتى جانە جوعارعى سوتپەن بىرلەسىپ ازىرلەنگەن قوسىمشا باقىلاۋ شارالارى قولدانىلاتىنىن مالىمدەگەن.
ەسكە سالساق، 2022 جىلدىڭ قاراشاسىندا پۋتين كەيبىر اۋىر قىلمىستار ءۇشىن سوتتالعان جانە سوتتىلىعى الىنباعان ازاماتتاردى موبيليزاتسيا اياسىندا اسكەري قىزمەتكە شاقىرۋعا مۇمكىندىك بەرەتىن زاڭعا قول قويعان بولاتىن. سودان بەرى ۋكرايناداعى اسكەري وپەراتسياعا قىلمىس جاساعان ادامداردى تارتۋ تاجىريبەسى بىرتىندەپ كەڭەيتىلىپ كەلەدى.
