Nur-Sultan qalasyndaǵy Nazarbaev Zııatkerlik mektebiniń 12-synyp oqýshysy Jánııa Abjan AQSh-tyń bes ýnıversıtetiniń shákirtaqysyn utyp aldy, dep habarlaıdy «Adyrna» tilshisi.
Jánııanyń aıtýynsha, AQSh-tyń Sent Lýıs, Vashıngton & Lı, Tampa jáne Ońtústik Florıda ýnıversıtetteriniń shákirtaqysyna ıe bolǵanymen, Notr-Dam ýnıversıtetiniń jaýabyn asyǵa kútken.
- Bes joǵary oqý ornynan shaqyrý keldi. Sonyń ishinde, Vırdjınııa shtatynda ornalasqan Vashıngton & Lı ýnıversıteti eńbegime qaraı meniń oqý, jatyn oryn jáne tamaqtaný shyǵyndaryn tolyǵymen óteıtin shákirtaqysyn usyndy. Al Sent Lýıs ýnıversıteti Prezıdenttik shákirtaqy taǵaıyndady. Ózge eki joǵary oqý orny da eń joǵary shákirtaqy usyndy. Alaıda, men Notr-Dam ýnıversıtetiniń jaýabyn asyǵa kútip júrdim. Sebebi, ol AQSh-tyń úzdik ýnıversıtetteriniń reıtıngisinde únemi joǵary oryndarǵa ıe. Sondaı-aq, ol Chıkago qalasyna jaqyn ornalasqan, bul, óz kezeginde, álemdik kompanııalarda tájirıbeden ótýge múmkindik beredi. Atalmysh ýnıversıtet áý bastan meniń armandaǵan ýnıversıtetterimniń biri boldy. Joǵary akademııalyq jetistikterden bólek, meni ýnıversıtet qaýymdastyǵy qyzyqtyrady. Stýdentter uıymshyldyq pen ýnıversıtet rýhyn erekshe atap ótedi. Kondolıza Raıs sııaqty tabysty tulǵalar men túlekter stýdentterge jıi dáris oqıdy, - deıdi ol.
Jánııa – mektepishilik ómirdiń belsendi qatysýshysy, túrli olımpıadalarǵa qatysyp, eriktilikpen aınalysyp júrgen alǵyr oqýshy. Ekonomıka, aǵylshyn jáne bıologııa pánderin tereńdetip oqyp jatqan onyń tańdaýy «Kompıýterlik ǵylymdar» mamandyǵyna tústi. Degenmen, aldaǵy ýaqytta qos mamandyq alý onyń josparynda bar.
- Notr-Dam ýnıversıteti usynǵan shákirtaqy oqý, jatyn oryn jáne jol shyǵyndarymdy tolyq ótep, medıınalyq saqtandyrý jáne oqýlyqtarmen qamtamasyz etedi. Osy oraıda, mektebimniń, muǵalimderimniń bergen bilimi men qoldaýy úshin úlken alǵys bildirgim keledi. Alǵan bilimimdi durys qoldana otyryp, Magıstratýra, PhD baǵytynda biliktiligimdi arttyrǵym keledi. Maqsatyma jetýde «Tek qana alǵa!» degen ómirlik ustanymymnyń kómektesetinine senimdimin,- deıdi jas zııatker.
«Adyrna» ulttyq portaly
